Vawiin khan Mizoram Civil Service (MCS) probationers 10 te’n Urban Development & Poverty Alleviation (UD&PA) Minister Pu Zodintluanga chu a pisaah an hmu.

Pu Zodintluanga chuan MCS officer tharte lawmin rinawm leh dik taka sawrkar hna thawk turin a fuih a, kawng thui tak an la zawh turah an pen sual chuan mite rin kai a har tawh tih hriaa bul tan tha turin a chah. Minister chuan MCS te chu sawrkar inrelbawlna fawng vuantu ber an la ni dawn a, ram hmasawnna kawngah mawhphurhna thui tak an la neih dawn avangin an hna tui chilh a, sawrkar leh mipui tana malsawmna nih tum turin a chah a. Thlemna leh harsatna tam tak hmachhawn tur an la neih dawn avangin thil dik leh diklo thliar a, mahni inrintawkna nen fimkhur leh uluk taka ngaihtuahna seng chunga thutlukna siam thin turin a fuih a ni.

A department enkawl meka hna an thawh dan te tarlangin UD&PA, PHE leh Sports changtu Minister chuan e-office neih tuma tan an lak dan te; Aizawl khawpui chei hna leh khawpui tawt lutuk tihziaawm nana motor kawngpui pengthuam (junction) lun zual zauhna tura ruahmanna an neih te; tui lak, sem leh khawl dana ruahmanna an neih te bakah chenna in nei lote tana in sak sak chungchanga sawrkar ruahmanna te a sawi a. Heng ruahmanna a taka tihhlawhtling tute hi sawrkar hnathawk rualte an nih avangin mipui leh ram tana malsawmna ni tur chuan sawrkar hnathawkten rinawmna, taimakna leh dikna nena hna an thawh a tul a ni, Pu Zodintluanga chuan a ti.

Administrative Training Institute (ATI) Joint Director Pi Angela Zothanpuii’n MCS probationers te hi a hruai a, August ni 29 hian foundation course training hi an zo dawn a ni.