Nimin tlai khan Mizoram Civil Service (MCS) probationer-te chuan Mizoram Chief Minister Pu Lal Thanhawla chu a pisaah an hmu.

Pu Lal Thanhawla chuan MCS training mekte chu mi vannei leh hmalam hun eng tak nei an nih rualin he hna an zawm ni atang hian an kovah mawhphurhna lian tak a innghat nghal tih hre turin a chah a. Sawrkar hnathawk tam tak zingah neitu rilru pu lova hlawhfa rilru pu, tlemte thawka tam tak lakluh tum an tam avangin kuttlinglova sum lak luh pawi tihlohna an nei thin tiin Chief Minister chuan MCS training mekte chu he rilru puthmang thalo nuaibo turin a fuih a, thudika ding ngam tur leh hlemhletna leh eirukna laka fihlim tura ngaih in ni, a ti. An laka mipuiin beiseina sang tak an neih hlenchhuak turte, mipui mimir hawihawm taka dawr thin tur te, an nungchang, inchei dan, ei leh in leh nun dan uluk turin a fuih bawk. Chief Minister chuan Administrative Reforms Commission-2na in rawtna a siam zingah sawrkar hnathawk ten an thawh that dan a zira kaisan ‘performance link promotion’ chungchang pawh sawrkar hian a ngai pawimawh tawlh tawlh dawn a ni tih sawiin rinawmna, taimakna, dikna leh takna nena hna thawk turin MCS training mekte a fuih a ni.

MCS probationers-te hi mi 15 niin Administrative Training Institute (ATI) ah an training mek a. ATI Director Pi Ramdinliani leh Jt.Director Pi Angela Zothanpuiite’n an hova. MCS probationers training dan tlangpui leh kalphungte Chief Minister an hriattir bakah ATI in hma a sawn zel theihna tur leh MCS te’n hei aia hlawk zawka training an neih theih dan tur nia a hriat rawtna thenkhat an thlen bawk.

Chief Minister hi Principal Secretary to Chief Minister Pu Lalram Thanga leh Principal Adviser to Chief Minister Pu R.L.Rinawma te’n an tawiawm a ni.

Attachment

  • Loading attachment...