Vawiin chawhnu khan Mizoram Civil Services Sports & Cultural Association 32nd Annual Sports Meet closing function Ramhlun Indoor Stadium, Aizawlah hman a ni a, Pu Robert Romawia Royte, Sports & Youth Services Department minister chu Khuallian niin he hun hi a hmanpui.

Minister Pu Robert Romawia Royte chuan Mizoram chu mipui hriselna state ni turin kawng hrang hranga hmalak mek leh hmalak zel tum anih thu a sawi a,' Fit India movement rualin Fit Mizoram movement tan a ni a, chumi hma chuan March 22, 2019 khan Fit Mizoram Run te buatsaih alo ni tawh bawk a ni,' a ti a,' MCSS & CA 32nd Annual sports meet hlawhtling taka kan neih tak hian Mizoram sawrkar hnathawkte thawhhona leh inluangrualna tha a awm zia a tilang chiang hle a ni,' a ti bawk. Pu Robert Romawia Royte chuan Sport council in infiamna discipline 32 a tar lan zingah Mizoram atanga National games a kal thin te chu discipline 12 ah chiah an la tel thu a sawi a,' Hmasawna tur hmabak kan la ngah hle a, discipline hrang hranga hma kan sawn theih nan Mizoram State sport policy hman theih tur a duan mek a ni,' a ti a,' Games hrang hrang zinga discipline thenkhat, langsar ta vaklo mahse pawimawh si, entirnan, athletics ang chi te huam kim a, chawi nun leh nan Mizoram State Games buatsaih a tul hle a, hemi atan hian hmalak mek a ni,' a ti bawk.

Vawiin MCSS & CA 32^nd Annual Sports meet kharna hun hi Pu Zothanmawia, Director, Sports & Youth Services Department in a kaihruaia, Pu Rosangliana, General Secretary, MCSS & CA in  32^nd Sports meet report tlangpui a pe a, lawmman semna hun hman a ni nghal a ni.

Mizoram Civil Services Sports & Cultural Association 32^nd Annual Sport Meet ah hian discipline panga, Badminton, Chess, Carrom, Volleyball leh Table tennis ah inelna neih a ni a, Police department team-A ten Over All Champion Trophy an la a ni. Sports Meet hi Ni 10, September 2019 a tan niin Ramhlun, Bawngkawn, Electric veng Indoor stadium leh MTTA hall, Mission Vengahte infiamnate hi neih a ni a, player 1559 te an inel a ni. Badminton ah Police department team-A an champion a, Chess ah PWD, Table tennis ah PHE, Carrom board leh Volleyball ah Power & Electricity department in champion trophy an la bawk a ni.