Vawiin khan New Economic Development Policy (NEDP) hnuaia kalpui tur Mizoram  Entrepreneur te inelna tur ‘Business Plan Competition’ leh  ‘Entrepreneur Summit’ neih tur chungchangah Mizoram State Entrepreneurship Development Monitoring Committee (MEDMOC) leh IIMCIP, Kolkata ten MEDMOC Chairman, Pu Lalmalsawma, IAS, Chief Secretary hriatpuina in thawhhona thuthlung (MoU) an ziak. 

MoU hi Chief Secretary office chamber ah MEDMOC  aiawhin Dr. Lalrinchhana, Secretary in a ziak a, IIMCIP aiawhin DR. Subhrangshu Sanyal, CEO in a ziak a, he Business Plan ah hian Mizorama Entrepreneur hrang hrang ten sector hrang hrangah inelna thianghlim neiin lawmman tha tak siam ani  ang. MEDMOC hmalakna hian Start-Up Capital pawh kalpui a ni a, Entrepreneurs te bultanna leh hmalakna tur sum (capital) pawh hemi kaltlang hian ngaihtuahsak an ni a. Vawiin a MoU ziahna ah hian Business Plan brand name atan “Zoram Kailawn” an thlang nghal bawk. 

Vawiin vek khan IIMCIP, Kolkata hotute hian I&PR Director pisa an tlawh a, I&PR Director Pi Lalnithangi leh I&PR Jt. Director/Chief Media Officer Pu David L. Thangliana te kawmin I&PR Department chu an hmalakna a thawhpui turin an sawm a, media lama a tul ang ang a hma la ho tur leh thawkho turin remruatna chi hrang hrang an sawiho a, July ni 12, 2017 (Nilaini) hian Press Conference neiin IIMCIP, Kolkata hmalakna tur te mipui hnena puanzar nise an ti bawk.