Ramngaw, tuihna leh nungcha humhalh kawnga hmala tu pawl Mizoram Environment & Forests Consultative Forum (MEFCOF) chuan nimin khan Thiak khawtlang hruaitute nen Thiak Community Hall ah inkawmhovin Thiak khaw ram huamchhungah Zotheihuan siam turin thu an thlung.

Nimin inkawmhona hi Pu Rintluanga, Village Council President, Thiak in a kaihruai a, Pu VL Bela, President, MEFCOF in Zotheihuan chungchang leh MEFCOF thil tum te sawifiahna hun a hmang a, Pi Lalnipuii, Vice-President, MEFCOF in Zotheihuan pawimawhna leh a tangkaina te, hemi chungchanga hma an lo lak tawh dan leh hlawhtlinna an hmuh chhoh dan te a sawi a, Pu Lalhrima Sailo, Financial Secretary, MEFCOF leh Prof. Lalneihzovi, Executive Committee Member, MEFCOF te pawhin Zotheihuan pawimawhna leh sik leh sa humhalh a pawimawhzia te an sawi a, zawhna leh chhanna hun hman ani bawk a ni.

"Zotheihuan" hi ramngaw leh nungcha humhalhna tur leh tuihna tihpun na tura ram humhalhna hmanrua a ni a, MEFCOF kaihhruaina in Mizoram khaw 98 ah Zotheihuan hi din ani tawh a, Mizoram Sawrkar duh dan angin Mizoram chhunga khua zawng zawngah Zotheihuan hi din tum a ni.

Thiak khawtlang hruaitute chuan MEFCOF in Zotheihuan siam tura thawhpuia an sawm chu lawmawm an tih thu an sawi a, Thiak khaw ramngaw chu tun hma atang pawha tha taka humhalh thin anih thu sawiin theihtawp chhuah a tan lak thar leh sauh sauh an tum thu an sawi a, Zotheihuan atan hian Thiak khaw safety reserve leh supply reserve chin zawng zawng bakah Sekawihnar atanga Tuichar ram zawng zawng tlak lamah an ruahman thu an sawi bawk a ni.

Zotheihuan siam tura inremna hi MEFCOF aizawhin an President Pu VL Bela'n a hming a ziah hnan a, Thiak khawtlang aiawhin Village Council President, MUP president, MHIP President leh YMA President theuh ten an hming an ziah hnan a ni.