March 13 a neih tak Mega Mock Drill atanga Mizoram-in lirnghing laka inralrinna tur a neih te thlir hovin vawiin khan Disaster Management & Rehabilitation conference room, Chawnpui-ah sorkar department pawimawh ten Pu P.C.Lallawmsanga IPS , Principal Secretary DM&R hovin hma lak zui dan tur an sawi ho.

Tarlan fo tawh angin Mizoram hi lirnghing na tak thlen theihna hmuna awm a nih avangin chhiatna rapthlak tak thleng thei laka inven fimkhur a tulzia he meeting ah hian sawi nawn a ni a. Kum 52 chhungin lirnghing 7.5 Richter Scale a na in hmarchhak bial hi vawi 10 a sawi tawh a. Tun hnai kum eng emaw zat hetianga na lirnghing hi a thlen ngai tak loh avangin englai pawha thleng thei a ni tih ram hruaitu te, sorkar hotute leh mipuiin an hriat chian theih nan nasa zawka inzirtirna kalpui a pawimawh tih he meeting ah hian sawiho a ni a. Lirnghing na tak a thlen palh a inralrinna tur thil pawimawh, inbiakpawhna lam te, eitur supply na tur kawng te, hmun ralhima inthiar chhuahna tur chungchang te, damdawia inenkawlna leh tui supply chungchanga ruahmanna siam dan tur te sawiho a niin department hrang hrang te chu disaster managment plan atana rawtna an neihte DM&R ah thehlut tura hriattir an ni.