Union Agriculture Minister, Shri Sharad Pawar chuan kum 2012 hi India ram pumpui atan ‘Year of Horticulture’ atan a puang a. Hemi pual hian Mizoram Horticulture Department pawhin 29th May, 2012 - 1st June, 2012 chhung hian Mizoram Assembly House Annex-ah Mega Sale-cum-Seminar a buatsaih a. Hetah hian thlai, thei leh pangpar chi hrang hrang hrisel tha phun tur kuthnathawktu ten an mamawh an lei theih turin pho chhuah a ni. He seminar hi Parliamentary Secretary Pu K.S. Thanga, chuan vawiin khan a hawng a.
Pu K.S. Thanga chuan mimal hamthatna siam sak ai chuan ram siamthat ngaih pawimawh hmasak zawk a. Mimal in thlai chi belhchian dawl lo, hrisel tha leh thar hlawk tur anih pawh hriat hleih loh supply thin chu titawh lovin, a chi tha chauh Department mithiamten an enkawlpuina hnuaia siam chhuah, Quality Planting Materials ngei hmanga bul tan hi ngaih pawimawh a ni a. Chuvangin a siam chhuahna lamah theihtawp chhuah bakah Kuthnathawktute pawh a theih chin chinah pek an ni a ti.
Mega Sale-cum-Seminar neih chhung hian Kuthnathawktute tan subject hrang hrang Horticulture mithiam ten an zirtir bakah sawihona neih nghal a ni. Loneitute tan Horticulture Department chuan theihtawp a chhuah zel a, hmasawnna chi hrang hrang neiin ram chhung state dangte neih loh India rama a hmasa ber atan Israel Technology hmangin Horticulture Centre, Chite ah Scion Bank a din fel tawh bawk a. He scion bank atang hian kuthnathawktute mamawh ser phun tur hrisel, thar hlawk tur tam thei ang ber siam chhuah beisei a ni. Hemi kawnga Mizoram Horticulture Department in a thawh that avangin India ram pumah lawmman pakhatna Excellent Award pawh a dawng a ni.
Mega Sale-cum-Seminar hian a tum te chu, huan siam tur tan thlai/ser chin tur tha an neih theih nan te, Mizoram mipui leh kuthnathawktuten thlai chi tha leh hrisel chauh hi dinchhuahna bul a ni tih an lo hriat nan te, registered nurseries te leh hmanrua dang zuartuten inpho chhuahna hun an neih na bakah kuthnathawktu leh department hnathawktute inkarah thawhhona tha a awm theih nan a buatsaih a ni.
