Thian duhtak te u,

Armed Forces Flag Day hi kan ram pumah kumtin December ni 6-ah hman thin a ni a. He Ni pawimawh tak hi ram mipuite chhanhim nan a lo thawk tawh mihuaisente leh ram tan an nunna hlantute chawimawi nan leh, kan sipai huaisente hnathawh ropui tak kan thlawpna lantirna Ni a ni.

Armed Forces Flag Day hian thil tum pawimawh tak pathum a nei a. Chungte chu tihhlawhtlin a nih theih nan mipuite tawiawmna leh thawhpuina ngen a ni:-

(i) Indona avanga ram tuileilote chhawmdawlna

(ii) Sipai bang leh an chhungte inbenbelna leh an hmakhua buatsaihsak, leh

(iii) Sipai tanglai leh an chhungte hmakhua thatna tur ruahman te, an ni.

Heng thil pathum tihlawhtlin nan hian mipui mimir phungbawmna ngen thin niin, a bika siam flag te zuar a, thawhlawm khawn thin a ni. Armed Forces Flag Day-ah hian sipai chi hrang pathum – Khawmual, Boruak leh Tuipuia mi huaisen tak tak, ram leh hnam chhanhim nana an nunna thapte chungah bat kan neih nasatzia min hriatchhuahtir a. Ralmuan lai pawhin ram inrelbawlna chhawmdawl nan thupek kenkawh hna rim takin an thawk a; Tuilian emaw, lirnghing leh thlipui emaw vanga chhiatrupna thlen changin chhanhim hna an thawk bawk a. An inpekna hlu tak avang hian an chhung leh khatten harsatna tam tak an tawh phah bawk thin; sipai tam tak ramtuileilo in an awm phah bawk. Khawmual, tuipui leh boruakah pawh ni se, sik leh sa, riltam leh tuihal dangchar karah pawh ram venghimtu rinawm tak an ni reng fo thin a ni.

Heng kan mihuaisente inpekna avang leh indona in a nghawng ramtuileilo leh hmeithai a hnutchhiah tak te leh an chhungte theuh hi duat leh ngaihsak taka chhawmdawl kan ba a. Hei hi hre reng chungin tun chawlhkar chhung hian Mizoram pumah thawhlawm khawn a ni dawn a; Zoram mipui mimir zawng zawng, sumdawng leh Sorkar hnathawk te chu thahnemngai taka thawhlawm thawh turin ka sawm che u a ni.

Jai hind