Chibai, 

India ram ropui takin  Republic Day champha vawi 71-na a hman Ni ah hian Mizoram dung leh vanga khua leh tuite duhsakna chibai ka buk a che u. Vawiin hi kan tana ni pawimawh tak, ni hriatreng tlak a ni a. He hunah hian tuna kan dinhmun, ram leh hnam lo indinchhuahna, mahnia inrelbawl kan nihna leh kan inpumkhatna theihna chhan hi kan hruaitu kaltate leh zalenna sualtute inpekna thuk tak avang a nih tih hre reng ila. Kan hruaitu kaltate inpekna leh hlawhtlinna avang hian an chungah  lawmna chang hre thar leh turin kan inchah nawn leh e. 

Kan ram Danpui hi "India, chu chu Bharat tihna" tih ziakin  a in tan a. Tuan leh mang atang khan Bharat chuan Khawvelah mitinte intluktlanna, nunphung leh hnam thilah te a lo thawh hlawk thin hle a ni. He ram hi khawvela Sakhaw lian deuh deuh te lo pianna hmun a ni a. Kan hriat phak hma atangin khawvel pum huap changrelnaah  kan ram hian dinhmun pawimawh tak a lo luah thin a ni. 

Tun kum zabi kal mekah India tan a bik takin hmalam hun a eng leh zual engzual tih hi ka ringnghet tlat a. Kum zabi 21-na hi India tan midangte hnehchhiah leh va run tumna hun ni lovin India in Khawvel tana hmasawnna leh remna leh muanna a thlenna hun a ni dawn tih ka beisei a ni. Bharat nihphung tak chu Vasudhaiva Kutumbakam a ni a. A awmzia chu, "Khawvel pumpui hi chhungkaw pakhat a ni" tih hi a ni a. India nihphung chu huapzo, mitinte thlamuang taka an awm tlan theihna; tawng, hnam inthliarna leh rinna avanga tunmah in enhran lohna ram a ni. 

Vanduaithlak takin tunlai hian ram inpumkhatna ngaimawhtu, mi thenkhatte avangin inhmuhthiamlohna neuh neuh te a awm thin a. Ngun taka kan ngaihtuah erawh chuan, ram leh hnam inpumkhatna aia pawimawh kan tan a awm lo a ni. Hei hi kan hriat chian viau pawh a tul hle a. Thil pathum, kan tana pawimawh ber - rammi nihna, inpumkhatna leh mahnia ram inrelbawl hrang kan nihna te dah pawimawh ber a nih zel theih nan kan theihtawp kan chhuah tlang tur a ni. 

Kan state kaihhnawihah lo lut ta ila. Kan hriat theuh angin kum khat chhung lekin kawng hrang hrangah chak takin hma kan la tan a, State sawrkar chak tak leh state  intodelh kan nih theihna turin lungphum pawimawh tak tak  kan phum hman der tawh a ni. Kan Flagship Programme, 'Socio-Economic Development Policy'(SEDP) tih puitlina turin a bul tan nan Board 14 pawh kan din tawh a. State pum huapa hmasawnna hna thawk turin Autonomous Districs Council huamchhungah te thlengin hma kan la mek tawh a ni. 

Nikum lam khan Sinlung Hills Council Inthlanna te hlawhtling takin nei a, a lawmawm tak zet a. Hei hian helai bialah hian remna leh muanna tluantling a siam  ngei pawh ka ring a ni. Mizoram State Games hlawhtling taka kan nei thei ta khan min ti lawm hle a; Infiamna khawvelah hma kan sawnna turin ke pen a ti chak sawt dawn tih a chiang a. Hetih rual hian kan state tana hmasawnna huapzo kan neih theihna tura Kohhran leh Tlawmngai pawl  hrang hrang te thawhpuina tha tak kan neih avang pawhin lawmawm ka ti bawk a ni. 

A tawp berah chuan khua leh tui zawng zawng te Mizoram leh India ram hmasawnna tur leh hlawhtlinna sang zawk kan chan theihna tura tan la zel turin ka ngen a. Vawiin ni pawimawh takah hian kan Ram Danpui laka rinna nghat thar leh tur leh rinawm tura intiam thar leh tur leh, kan ram zalenna sualtute lo hmathlir ti hlawhtlin tum tura inpe thar leh turin kan in chah bawk a ni. 

Republic Day duhsakna Chibai ka buk nawn leh a che u. 

KA LAWM E. 

Jai Hind.