SPEECH OF HON'BLE GOVERNOR P.S. SREEDHARAN PILLAI ON THE OCCASION OF 71ST REPUCLIC DAY, 2020

Thian duhtakte u, 

Republic Day vawi  71- na hun pawimawh takah hian vawiina helai hmun a lo kal zawng zawng leh Mizoram mipui zawng zawng hnenah duhsakna chibai ka hlan a che u. India ramin Danpui, Constitution kan neih tan ni January ni 26, kum 1950 kha kan tan ni ropui leh chhinchhiahtlak a ni kumtluan tawh dawn a. He ni hi sawrkar ropui, mipui rorelna sawrkar kan neih theihna ni a ni a. He ni a lo thlen hian ramin zalenna sualchhuaktute inpekna kan hre rengin, kan zahna kan lantir bawk a ni.

Kan mi hmasa, ram danpui lo siamtute khan hmathlir thui tak leh fing tak neiin, Constitution chu ram thar dinna tur atana innghahna thurin an siam a ni satliah mai lova: ram khua leh tui / vantlang nun siamthar a alo awm theih nan a hmasawnna rahbi an lo sial a ni zawk a ni. Chung hma an lo lakna chu vawiin thleng hian kan vhhawr tangkaiin, kan hnathawh, kan thil tum leh kan hmalakna engkimah kan ram danpui chu min kaihruaitu  rinawm a ni chho zel a ni.

In hriat theuh angin ka sawrkar chu kum khat chuang tluang takin a kal tawh a. He hun chhung hian state intodelh leh chak zawk leh thangduang ni turin kawng hrang hrangah hmalakna siam a ni.

Kan state chuan tun kum reilote chhhung khan economy lamah nasa takin hmasawnna kan nei a. Nikum chhung khan economic growth rate/ ei leh bara thanna chu 14.82% niin, India ram state dangte nen khaikhin pawhin a thang chak ber pawl kan ni a. Kum 2012-2018 chhung khan Mizoram hmasawnna chu chawhrualin 12.75% niin, hetiang taka kal tluan hi kan la nei ngailo a ni. Hetiang ang zela kan kal chho a nih chuan kum 10 chhung chuan retheihna um bovin, state intodelh leh sum lakluh inrualkhai tak kan la ni mai ang tih ka ring nghet tlat a ni. Hei hi duhthusam mai nilovin, thil thleng thei tak tak a ni a. A hlawhtlinna chu kan zavaia kan tanhona ah a innghat a, inchhuang tur pawh kan ni reng a ni.

Kan hmasawnna hi (sector) hrang hrangah a innghat a. Hengte hi sawrkar hmalakna pui ber Socio-Economic Development Policy (SEDP) hnuaiah khaikhawm niin Mizoramin hmasawnna tluantling a neih theih nan heng (key sector) te hi an pawimawh em em a ni. Chak taka hma la turin SEDP hnuaiah Board 14 din a ni a, heng board te hi Minister, MLA leh mithiam bik te leh official te enkawlna hnuaiah kalpuiin, SEDP hmalakna kalpui tura ruat sawrkar department 25 hmalakna an enzuiin an kaihruai dawn a ni. SEDP hnuaiah hian Nationl Bamboo Mission nen tangkawpin rua chi hnih – Dendrocalamus Latiflorus leh Dendrocalamus Brandisii te chu Area Expansion Scheme a kalpui tan mek a ni. 

Ka sawrkar chuan kuthnathawktute hi a ngaihpawimawh in, an hamthatna leh an eizawnna tihchangtlun sak chu a tum pawimawh ber a ni reng dawn a. Anni hi kan economy innghahna an ni a. An harsatna thawh thin hrang hrangte pawh kan hriaiin hmalakna hrang hrang lo lak tawh thin a ni a. Chung zingah chuan kum 2020 a kuthnathawktute te sum lakluh a let a a lo pun theihna turin State level ah leh District level ah te Coordination Committee din a ni a, heng committee te hi state level ah Chief Secretary hnuaiah leh district ah chuan Deputy Commissioner te hnuaiah hnathawkin ngawrh takin hna an thawk a ni.  Buh leh thlai a intodelhna tur kawng khat atan Japan International Cooperation Agency (JICA) nen thawk dunin ka sawrkar chuan “Capacity Enhancement for Sustainable Agriculture and Irrigation Development in Mizoram” project chu a kalpui mek bawk a. Thingtlang khaw hrang hrangah warehouse te, thei leh thlai thar sawngbawlna te, dahthatna kudam te, wholesale a hralhchhuahna tur te ruahmanna siamin hnathawh a ni a. Ran vulh kawngah pawh nasa taka tan lak niin, eizawnna ngelnghet a nih theih nan hmalak zel a ni bawk.

Horticulture hmangin kan state ah hian hna siam a ni a, chhungkaw sum lakluh tipung turin theihna  tha tak kan nei a.  Sik leh sa inthlak nasat lutuk avang erawh chuan kan thei leh thlai kui dan kalphung hi thlak danglam a ngaihna chen a awm thung. State pawn a thawn chhuah turin tunhnaiah Dragon Fruit leh serthlum tam tham tak chin a ni a, engemawzah pawh thawnchhuah lo ni tawh in, thlai chin kawngah pawh ‘cluster mode’ kalpui tharin, hemi avang hian (Off season) laiin tomato leh zikhlum te kan neih theih phah a. Kuthnathawktute pawhin an hlawk phah hle a ni.

Thei leh thlai te vawnthat a, um hmin na tur leh thianghlim taka (pack) fun/ tuam na turin Sairang ah 80 MT dawng thei Integrated Pack House sak mek a ni a, hemi bakah hian Serchhip, Kolasib, Lunglei, Mamit leh Aizawl ah te Integrated Pack House 30MT satellite unit sak mek a ni bawk a. Serchhip leh Aizawl ah thei um hmin/ tih hmina Ripening Chamber 50 MT siam a ni bawk. Ripening Chamber hi Baktawng ah hawn ni tawhin, theirah chingtuten hun reilote chhunga an thei tharchhuah te an hralhchhuah nghal theihna turin leh mihring tana hrisel lo calcium carbide hman a nih loh nan heng ripening chamber te hi an pawimawh em em a ni.

Hmasawnna ruangam tha tak neilo chuan hmasawnna hi a tluantling theilo a. Thingtlangah a pawimawh zual hle bawk a. Hmasawnna rualkhai tak thlen turin tunah hian Border Area Development Pogramme, Pradhan Mantri Krishi Sinchaye Yojana, Mizoram State Rural Livelihood Mission, Shyama Prasad Mukherjee Rurban Mission, Pradhan Mantri Gram Sadak Yojana leh hmalakna dangte kalpui mek a ni a. Heng hmang hian mipui sum dehchhuah a pun a, khawtlang nun in hma a sawn zel theih beisei a ni.

State hmasawnna hi Autonomous District Council Area te hmasawnna tello chuan a famkim theilo tih ka hria a. Ka sawrkar chuan District Councilte huamchhungah hmalakna thar hrang hrang kalpuiin, LADC huamchhungah zirna tihhmasawn nan school building 49 sak zawh a ni a. CADC huamchhungah mipuiin tui in tur thianghlim an neih theih nan in tin a tui connection siamna tur Kalamanagar Water Supply Scheme chu buatsaih niin, tunah hian NEC phalna nghah mek a ni. CADC chhungah hian in tin electric connection an neih theih nan Ministry of New & Renwable Energy hnenah thlen a ni tawh bawk a. Inkalpawhna kawng tha zawk siam turin hmalak a ni bawk

Kum kalta a Sinlung Hills Council inthlan hlawhtling tak leh tluang taka kan nei kha ka lawm takzet a, mipuiten an duhthusam leh beisei ang ngeiin remna tluantling leh inrelbawlna nghet a awm chhunzawm ngei ang tih ka ring tlat a ni. Hmar People's Convention (Democratic) te nen kum kalta April ni 2 a inremna thuthlung kan ziah khatihlawhtling turin theihtawp kan chhuah zel dawn a, Sinlung Hills Council huamchhunga hmasawnna dik leh tluantling a thlen theih nan sawrkarin theihtawp a chhuah zel bawk dawn a ni. 

Mizoram mipui zawng zawng zatve dawn hi khawpuia cheng kan ni a, kan khawpuite hi an thanbelh zel avangin khawpui hmasawnna leh mamawh kan ruahman rualin sik leh sa tichhelo thei ang bera hma kan lak a pawimawh hle a ni. Ka sawrkar chuan khawpui atana a puan khaw 23 ah te hmasawnna ruhrel siam turin nasa takin tan a la a, State Priority projects leh State fund of Minor Works hnuaiah pawh Multi-level car parking, Sports stadium, Auditorium, phul lem (Artificial Turfs) etc siam mek niin siam belh tur pawh ruahmanna kalpui mek a ni. 

India ram chhunga Smart City 100 siam tur zingah Aizawl khawpui pawh thlan tel ve a ni a, he project kaltlang hian Aizawl khawpui cheimawina leh tihhmasawnna turin ruahmanna tam tak siam a ni. Heng ruahmannate tihlawhtling tur hian a bik taka hma la turin Special Purpose Vehicle (SPV) din a ni nghe nghe. Swachh Bharat Mission (Urban) hnuaiah hian sawrkarin khawpui 23 a puan ah faina, thianghlimna leh hriselna hawi zawngin beihpui thlak mek a ni a, India rama state fail eh thianghlim ber ni turin theihtawp chhuahin tan kan la mek a ni. Khawpuia cheng ten eizawnna ngelnghet leh rintlak an neih theihna turin leh retheihna lak ata kan fihlim theih nan eitling thiam thil chi hrang hrang zirtirna ngawrh takin kalpui a ni bawk.

Thalaite hi kan hmachhuan ber an ni a, hmalam hun eng tak an neih theih nan zirna lamah leh hriselna lamah kawng kan sial sak hi a pawimawh em em a,  ram hmasawnna atan khua leh tui tha leh vengva tak kan neih a pawimawh ang bawkin hetiang tura kan thalaite chherchhuah hi ka sawrkar chuan a ngaipawimawh em em a ni. Lunglei, Mamit, Lawngtlai leh Aizawl district a ziak leh chhiar thiamlo tamna bialah Total Literacy Drive kan kalpui mek a. India ram chhiarpui ( Census of India 2021) thlir chungin SEDP  hnuaiah Special Eradication of Illiteracy Project (SEIP) ruahman mek a ni a, India rama ziak leh chhiar thiam tamna ber nih tumin tan kan la dawn a ni. Zirlai naupangten hlim leh phur taka sikul an kai theihnan sikul hrang hrangte thuam that mek a ni a, zirna hmanrua pawh a tha thei ang ber pe turin hma kan la mek a ni. Pianphunga rualbanlo zirlaite tan zirna tha leh changtlung pek hi kan ngaihpawimawh ber pakhat a ni bawk a ni.

Zirtirna dik leh tha pe tura zirtirtute pawimawhzia hi hai theih a nilo. Hei vang hian ka sawrkar chuan primary sikul zirtirtute pualin training pawimawh tak “National Initiative for School Heads and Teachers Holistic Advancement (NISTHA)” a buatsaih a. Primary zirtirtu  8951 hnenah training hi pek tur niin a thawhkhatna atan zirtirtu 4097 training pek an ni thawh a, thla tharah hian a thawhhnihna chhunzawm tur a ni ang. SCERT, Mizoram hi India hmarchhak a mit leh beng thalo te pual B.Ed Special Course nei awmchhun niin tluang takin he course hi an kalpui mek bawk a ni. Hei bakah hian English subject zirtirtute pualin tun hnai mai khan Diploma Course in English Language Teaching (ELT) an kalpui tan bawk a ni.

Eizawnna tlaka thiamthil inzirtirna (skill development) hi ei leh bar a kan intodelhna atan leh hmasawnna atana pawimawh ber zing ami a ni a, thalaite eizawnna tlak thiamna pek hi kan ngaihpawimawh em em rualin sawrkar in a kutken vek theih a nilova, mimal leh tlawmngai pawl hrang hrang te nen theihtawp chhuah a tan kan lakho a ngai a ni. Sawrkar pawhin hetiang thiam inzirtirna hi Industrial Training Institute leh Polytechnic kaltlangin a kalpui mek a. Vawiin hunin a mamawh ang zelin heng zirna hmun a hmanrua leh zirtirna te hi thlak danglama tihchangtlun zel a ni.  Heng bakah hian mimal leh tlawmngai pawlte enkawl skill development centre engemawzat kan nei bawk a, anni hian kan thalaite hmakhua sut eng kawngah awmze nei takin hma an la mek bawk tih ka hria a, ka lawm hle a ni. Thalai vengva tak leh thluak tha tak tak kan neih te thinlungah inrintawkna tuh a, an thiamna tih pun a eitling a siam tura kawng dik kawhhmuh hi kan tihtur pawimawh tak a ni.

Kan thalai infiammi ten hlawhtlinna leh hmasawnna an neih theihna tura kaihhruaina tha pek leh an thiamna leh theihna phochhuahna tur kawng dap sak hi kan ngaipawimawh hle a. Kum kalta a Mizoram State Games hlawhtling taka kan buatsaih thei kha ka lawm hle a, infiamna kawnga hma kan sawnna ah awmze thui tak a neih ka beisei bawk a ni. Kan infiammite tan hmanrua leh mamawh chi hrang hrang kan ngaihtuah zel dawn a ni.

Ka sawrkar chuan mipuite hriselna a ngaipawimah em em a, a bik takin thingtlang kilkhawr zawk a nu leh naupangten hriselna tha an neih theih nan theihtawp kan chhuah a ni. Hetih mek lai hian HIV/AIDS hian harsatna lian tak min thlen mek a, theihtawp chhuah a ral beih ang tak tak a kan beih let a tul tawh a ni. He natna darzau zel tur veng a titawp tur hian mipuite hnenah uar lehzuala zirtirna kan kalpui a tul in ka hria a, kohhran, khawtlang leh tlawmngai pawlte thahnemngaihna leh tanlakna a fakawm hle a ni, kan zavaia kan tanrual a theihtawp chhuah a kan beihlet chuan he indona ah hian hnehna kan chang ngeiin ka ring tlat a ni. Hei bakah hian mipuite, a bik takin miretheiten damlohna avanga inenkawlna senso tam tak an pek thin lo chhawk zangkhai turin tunhnai maiah khan Mizoram State Health care System thar ka sawrkar chuan a kalpui tan a, hei hi zirchiang a chhawr tangkai ngei ngei turin mipuite ka sawm che u a ni.

Kawlphetha hi hmasawnna kungpui pakhat a ni ti ila kan sawi sual tampui awm love. Kawlphetha indaihlohna phuhru tur chuan Kawlphetha siam chhuah kawngah hma kan sawn zel a tul a, ka sawrkar chuan ni zung chakna leh tui luang chakna hmanga kawlphetha siam chhuak tam turin ruahmanna engemawzat a kalpui mek a, hei bakah hian mipuiten kawlphetha khaihlak lova an hmuh theih nan kan kawlphetha pekchhuahna khawl te pawh thawm that chhoh zel a ni.

Mipuiten tui in tur thianghlim hniang hnar taka an hmuh theihnan ka sawrkar chuan theihtawp a chhuah a. Khawpui 23 kan neih zinga khawpui 15 ah tui intur thianghlim hi in tinah pek an ni, reilote chhungin a dang khaw pariatah te pawh hian in tinah tui thlianghlim pek vek akn inbeisei a ni. Hetih rual hian thingtlang khaw hrang hrang chawm turin Water Supply Scheme 14 kan siam mek a, kum 2019-2020 chhung hian khaw hrang hrang 228 a chhungkaw 34797  hnenah tui connection pek kan tum a ni.

Kan ram chhungah hnam tenau zawk ten thlamuang tak leh hlim taka nitin khawsak an rel hi a pawimawh em em a, heng sakhua leh hnam hrang hrang te tihdan phung leh kalphung te hi kan inzahsak a pawimawhin hun harsa tak tak karah pawh an hnam leh sakhuana vawng him tura theihtawp chhuah an ni tih kan hriatpui a pawimawh a, keini ngei pawh an dinhmun a ding thin kan ni tih i hre reng ang u. 

Industrial sector ti thang turin nasa takin hma kan la mek a, chung zingah chuan Mizoram Handloom & Handicraft Corporation Ltd (ZOHANDCO) tuai thar turin ruahmanna kalpui mek a ni. SEDP hnuaiah Industrial Development Board kan din a, mahni kutke a eizawnna kalpui tu (entrepreneurs) te kawng hrang hranga tanpui turin Entrepreneur Facilitation Centre kan din bawk a. Thenzawlah  Integrated Industrial Promotion Centre leh Mizoram Handloom Facilitation Hub kan sa dawn bawk a ni. Heng hmalakna hrang hrang te hian industrial sector ah hmasawnna nasa tak a la thlen ngei ang tih ka ring tlat a ni.

Tourism hi eizawnna huang zauh na atana pawimawh leh remchang ber pakhat a ni a. Kum 2019 chhunga Mizorama khualzin rawn kal sawrkarin a chhinchhiah zat hi 1,42,353 a ni a, hei hi a hma kum aiin za ah 63 (63%) laiin a tam a ni.  Tourism industry, a bik takin eco-tourism and rural tourism ah te hian kan tan kawng a inhawng zau lehzualin ka hria a, kan pi leh pute sulhnu hlui leh kan mi hmasate kutchhuak kan la neih ang ang te hi  khualzin hip tura kan humhalh a kan vawn that a pawimawh hle a ni.  Ka sawrkar chuan khualzin hip turin leh khualzin te himna turin ruahmanna tam tak a siam a, tunhnai maiah pawh khualzinte lo tanpuia an harsatna tawh ah te lo buaipui turin Tourist Police kan din nghe nghe a nih kha. Eco-tourism leh sik leh sa tichhelo zawnga khualzin hip turin ruahmanna hrang hrang nauban hmunpui, ngaw kara vah velna tur (nature trails) leh thirsakawr khalhna tur (cycling tracks) te pawh kan siam mek a ni.

Kan hnam rohlu leh nihphung te vawnhim hi a pawimawh em em a, kan hnam kalphung mila thalaite thiamna leh theihna haichhuah pawh hi a pawimawhin eizawnna tha tak siamna leh humsual dai palhna laka venghimtu pawh a ni tel bawk a ni. Thangtharte thinlunga kan pi leh pute nunphung leh zia rang tih nun zelna turin kawng hrang hrangin ruahmanna kan siam thin a, hei hi a tangkaiin a hlu hle a ni. 

Ramngaw kan tihchereu vanga sik leh sa inthlak danglam hi khawvel pumin a buaipui a ni a, keini pawh kan fihlim biklo tih chu a hrechiangtu kan ni theuh awm e, a nihna takah chuan tlangram a awm kan nih rualin tlang ram lo neih (jhum cultivation) kan la bansan theihloh avangin sik leh sa inthlak danglam hian nasa takin min la nghawng thei dawn a. Kan ramngaw leh nungchate humhalh kawngah tun aia nasa zawka kan harhchhuah a pawimawh hle a, chhuan lo la awm lehzel tur ten an chhawr tangkai theih tura kan ramngaw leh nungchate humhalh a, sik leh sa nuam tak siam hi kan mawhphurhna lian tak a ni tih i hre thar zel ang u.

Khawvel changkanna in a ken tel technology lama hma kan sawn tlan nan Digital India hi ngawrh takin ram pumah kalpui a ni a. Kan state ah pawh Mizoram Telecom Infrastructure Policy hi kalpui tum niin, hemi hnuaiah hian mipui tan inbiakpawhna tha zawk siam a nih theih nan leh internet access tha zawk an neih theih nana hmalakna tur a ni.

Tunlai technology hmang tangkaia mipui tan samkhaina siam turin kawng hrang hranga hmalak a ni a. Chung zingah chuan ration card lem tihreh nan Ration Card Management System Software tha zawk hman te, traffic dan bawhchhia tan awlsam zawka fine chawi dan kalphung e-challan hman te, online ILP portal siam leh NGO leh ILP kengkawhtute tan ILP Mobile application siam te a ni. Cyber crime dona turin Aizawl ah Computer Emergency Response Team laboratory siam turin North Eastern Council (NEC) ah dilna thlen mek a ni a. Hemi bakah hian Mizoram Police chuan ‘Mizoram Safety Act’ mobile phone application chu siam thar ni bawkin, hemi hmang hian mi tupawhin tanpui an mamawh hun apiangah police te hrilh zung zung thei tawh dawn a ni.

Hemi rual hian kan rama dan leh thupek kenkawh kawnga theihtawp chhuah thintu kan police te chungah lawmthu ka sawi a. An hmalakna vangin dan bawhchhiatna leh pawikhawihna thleng thei tur tam tak pumpelh a ni a. Mizoram Police chuan mipui leh police inkarah inlaichinna tha zawk siam turin leh tanpui mamawh hunah rang zawka police ten an bawhzui theih nan Social media Cell siamin Public Relations Officer an ruat a. Heng bakah hian tunhnai khan Aizawl District tan Aizawl police station ah police station thar, hmeichhe hlang in an enkawl chu hawn thar a ni a. District dangah pawh hmeichhe police station hi hawn belh zel tum a ni.

Mipuiten kham khawp ei tur an hmuh chu sawrkar ngaihpawimawh lain berte zing ami a ni a. Kan Public Distribution System (PDS) that avangin state hhung khawiah mah PDS kaltlanga ei tur supply khawpkhamlo sawi tur a awmlo hi a lawmawm hle a. LPG cylinder kan mamawh ang taawk suply a nih theih nan hmalak mek a ni a. Hemi kaihhnawih hian Bairabi ah LPG Bottling Plant siam hna chu tan tep a nih tur thu ka sawi duh a. Hei hian eirawngbawlna gas mipui mamawh chu nasa takin a phuhruk dawn a ni. Consumer-te kawtkaiah ngei eirawngbawlna gas sem tura hmalakna chu tunah hian Aizawl veng thenkhatah leh Kolasib ah hlawhtling taka enchhin a ni.

Unaute u,

A tawp berah chuan State sawrkar leh Central sawrkar hnuaia thawktu Mizorama awm zawng zawngte chungah an inpekna avangin lawmthu ka sawi a. Kan tlawmngai pawl hrang hrangte, khawtlang leh kohhran hruaitute, zirlaite leh media lama ka thiante chungah lawmthu ka sawi bawk a.

Vawiina State Medal dawngtu zawng zawngte he chawimawina hmu tura an hna theuh a theihtawp an lo chhhuah tawh naah a bik takin lawmthu ka sawi a. Vawiin Republic Day lawmna ti hlu tu kan parade contingent zawng zawng chungah lawmthu ka sawi bawk a ni.

Vawiin ni ropui takah hian in zavaia chungah Republic Day chibai ka buk nawn leh che u a.  He ram ropui tkah hian kan zavaiin khua leh tui kan ni vek tih hre thar leh ila. Eng sakhua pawh zawm ila, eng hnam pawh ni ila, he ram hi kan zavaia ta a ni a. Ram inpumkhatna hi vawng nung a tichak zel turin kan zavaiin thawh puiah ka sawm thar leh duh che u a. Mizoram chu state muanawm leh hausa taka kan siam theih nan tan i la tlang leh ang u.

JAI HIND