Mizo Hmeihchhe Insuihkhawm Pawl din champha phak a lo thlen hian Mizoram chhung leh pawn lama  Mizo hmeichhia zawng te kei leh ka nupui, Pi Joyatsna Sharma te chuan lawmpuina chibai kan buk che u. Mizo hmeichhia te hian Mizoram, Mizo hnam leh india hmasawn nan thiamna leh theihna in nei a. In finna leh  thiamna te ram leh hnam tan  hlawk taka hmang zel tur in kan duhsakna sang ber kan hlan a che u.

Mihring hian kan lo pian chhuah atangin Hmangaihna te,khawngaihna te,  ngilneihna, dawhtheina leh tuarchhelna te nu atangin kan zir thin a. Hmeichhia te ropuina te leh theihna te hi tunhma lam kha chuan hriat leh lawm a hlawh lo mai thei e. Chuti chung chuan hun kaltawh te han thlir let ta I la mihring chanchin ziahna ah chuan hmeichhe ropui te chanchin kan hmu teuh a ni. Hmeichhia te theihna leh thiamna hi mipa te thiamna aiin a nep chuang lo tih hi kan hriat a, kan pawm tlan a tha in ka hria. Tunlai khawvel ah chuan mipa thawh tur bik emaw hmeichhe thawh chi a awm tawh lova, hmeichia leh mipa ten inelna hmun pakhat, a thiam ber zel dinchhuahna hmunah kan inel ho vek tawh a ni.

Khawvel huap ah hmeichhia ten rorel tawh in khawvel ram ropui leh thil ti thei zawkah te pawh ramhruaitu nihna chelhin dinhmun pawimawh ber ber te an luah mek zel tih kan hre theuh awm e. India ram chhunga mihring tamna ber ber state tam takah khuan Chief Minister dinhmun tunge luah mek tih kan en chuan hruaitu nihna tlin tak tak hmeichhia te an ni. Mizoram chhungah ngei pawh sawrkar hnathawk lian deuh te, sumdawng hlawhtling, Municipal Corporator leh nihna pawimawh tak tak chelhtu bakah zirna sang zawka in elna midang te chunga leng  kan hmuh chu Mizo hmeichhia te an ni. Tunhnai mai ah khan  Mipa tam tak tih theih loh leh tih ngam loh chonna hmachawn in Mizo nula chhuanawm tak chuan khawvel a tlangsang ber, Mount Everest  pawh a lawn chhuak hial a nih kha. Kha kha Mizo hmeichhia te theihna san zia ti langtu ni in ka hria.

MHIP din champha phak pual hian Mizo mipui te hnenah ngenna ka siam duh a – taksa pianphunga awm nem zawk, hmeichhia te chunga hleilenna leh hmeichhia te dahhniamna reng reng hi na taka kan do let zel a ngai a. Hmeichhia te zahawmna humhim tur leh an dinhmun chawikan nan hian tun aia nasa zawk a hma kan lak zel pawh a ngai in ka hria. Hmeichhe zahawmna hi mipa tan pawh zahawmna a ni a, kan hmeichhia te zahawmna kan venghim zo lo a nih chuan mipa pawh kan mualpho a ni tih I hria ang u. Hnam anga zahawmna hi hmeichhia te zahawmna kan humhim leh hmeichhia te chanvo kan humhalh that sak danah a in nghat thui hle a ni.

Mizo khawtlang nun ah hmeichhia te an thlamuang in ka hria a, lawmawm ka ti tak zet a ni. Khawtlang inrelbawlna, kohhran rawngbawlna huang ah leh tlawmngai pawl inrelbawlna ah te kan hmeichhia ten dinhmun pawimawh an luah chho mek zel tih hi hriat a nuam a, hnamdang te mithmuh ah pawh a chhuanawm tak zet a ni. Amaherawh chu tun a kan dinhmun hi a hmeichhia te tana duhthusam a ni chuang lova hei aia nasa zawka chawikan an nih theihna atan leh hma an sawn telh telh nan nasa zawka hmalak kan la mamawh tih min pawmpui thei in ka ring. Mizoram hi hmeichhia te tan hmun him, hmeichhe chunga hleilenna rapthlak tak tak awm ve lohna hmun ah siam I tum ang u.

MHIP hian pawl anga an dinchhan, Mizo hnam hmasawnna leh Mizo hmeichhia te hmasawnna  atana hna pawimawh tak tak  an hnathawh mek te hi hlawhtlin pui ngei se, khawvel hriat ah Mizo hmeichhia te thiamna leh theihna te hi phochhuak zel se tih hi kei leh ka nupui Jyotsna Sharma chuan kan duh tak zet a ni.  Mizo hmeichhia te MHIP Day duhsakna chibai vek u le.