DONER buatsaih hmarchhak State pariat te football inelna Dr T.Ao Memorial Football Tournament, Gangtok, Sikkim-a neih zawh taka champion Mizoram Football Team te lawmpuina chu vawiin tlai dar 5 khan MFA buatsaihin Tourist Lodge ah hman a ni a, he hun hmanpuitu Sports Minister Pu Zodintluanga chuan player tleirawl naupang tak ten Senior level intihsiaknaa chak ber nihna an zuk chang thei chu chhuanawm a tih thu a sawi. Mizoram chuan infiamna lama hmakansawn nasat zia sawiin football ah phei chuanIndiarama football club hlun leh lian zawng zawng ah Mizo tlangval an tel tawh thu tarlangin infiamna (sport discipline) thenkhat ah phei chuan ram aiawha an chhuah fo tawh thu a sawi lang bawk. Heng zawng zawng awm theihna chhan chu sports association hrang hrang te thawhrimna leh thahnemngaih vang a ni tiin Minister chuan sorkar nena thawhhona pawh a that thu a sawi. Tunlaiah zuk leh hmuam, ei leh in leh ruihtheih thila insuma sports atana inbuatsaih mek thalai tam tak an awm tawh a ni tiin Minister chuan an nau zawk lo kal chho ve zel tur te tana entawntlaka awm chhunzawm zel turin champion team te chu a sawm bawk.

MFA President Pu Lal Thanzara pawhin lawmpuina thutawi sawiin lawmman pawisa fai tamna tournament liana Mizo team an zuk champion thei chu Mizoram football chanchinah thil chhinchhiahtlak a ni tiin Mizo chawimawitu an nih avangin lawmthu a hrilh a, an hlawhtlinna chuan midangte dan beiseina sang a siamsak dawn a ni, a ti.

Champion Team lawmpuina hun hi Sports Department Director Pu Lalzirmawia Chhangte leh 1st Bn MAP Commandant Pu V.Lalthakima te bakah sports association hrang hrang hruaitu ten an hmanpui a, Team member te hnenah hian Thangchhuah Diar hlan an ni bawk. MFA-in tihdan phunga a lo neih angin an pawisa fai lawmman dawn Cheng Nuai Sarih chanve hi player te hnenah hlan an ni a, a chanve Rs 3,50,000 /- chu MFA hnenah hian Team ten an hlan nghal bawk. He hun hmanah hian Team Manager Pu T.Vanlalhluna chuan an inbuatsaih chhoh dan leh khelh dan hmangte report a pe bawk a ni.