Vawiin khan Social Welfare Minister Pu PC Lalthanliana hovin Mission Foundation Movement (MFM) hnuaia Laithangpuii College of Pharmacy graduate thar te lawmpuina leh MFM School of Nursing a Health Worker zirlai tharte lukhum khumtirna Capping and Lamp Lighting hun chu Laithangpuii College of Pharmacy building, Lungbial, Zemabawkah neih a ni.
Pu PC Lalthanliana chuan MFM te hmalakna fakin rawngbawlna pawimawh tak thawktute an ni, a ti a. MFM chuan zirlaite tan hmakhaw eng tak an siam sak mai bakah Mizoram mipuiin kan mamawh em em health care lama mi thiam thahnem tak an chher chhuak hi ram tan a hlu a ni, a ti. Minister chuan Pharmacist zirchhuak tharte leh Health Worker zir mekte fuihin an thiamna piah lamah damlo te laka an rilru puthmang, tawngkam leh chetzia a pawimawh vek a, an tawngkam tha chu damlote tan hahdamna leh thlamuanna pe theitu a ni tih hrereng turin a chah a. Community Health lama mi tangkai Health Worker-te sawrkarin a ngai pawimawh tih sawiin Mizoram hmun kilkhawr zawka awm tur Health Worker engemawzat lak tharna tur ruahmanna a kal mek thu a sawi. Social Welfare Minister chuan an department kaltlangin naupangte hnenah calcium, vitamin leh damdawi dangte kum tin nuai za tel man an semchhuah thin thu leh heng damdawite hi mithiamten uluk leh fimkhur taka an endik thu he programme-ah hian a sawi lang bawk.
MFM hi kum 2002 khan din niin Managing Board OB 7 leh Committee Member 12 ten an enkawl a. An hnuaiah hian MFM School of Nursing, Laithangpuii College of Pharmacy bakah Pre Service Missionary Training, Community Health Clinic, Life Skill Institute, Community Development Programme-te an kalpui a ni. Mizoram Nursing Council phalna in kum 2009 khan MFM School of Nursing, Health worker zirna hawn a ni a. Batch 7 zir chhuak tawhin, mi 127 ten tha takin an zir chhuak a. Tun dinhmuah Teaching leh Non-Teaching Staff tiamin thawktu 12 an awm a, zirlai thar mi 20 an nei. Laithangpuii College of Pharmacy hi kum 2012 khan din niin tun dinhmunah thawktu 10 leh zirlai 49 an awm mek a. Mizorama Pharmacy College hmasa ber leh awm chhun a ni.
Pharmacist Graduation leh Health Worker Capping and Lamp Lighting Ceremony ah hian MFM Director Pu R.Vanlalzauva chuan kalkhawmte lawmna thu a sawi a. Capping & Lamp Lighting hi Sister (Rtd) Pi F.Biakengi’n kaihhruaiin Pharmacist Graduation hi Mizoram Pharmacists Association (MPA) General Secretary Dr. C.Zothanmawia’n a kaihruai thung. Health Worker leh Pharmacist Exam-a tithate hnenah khuallian Pu PC Lalthanliana chuan lawmpuina thilpek a hlan bawk a ni.
