Vawiin chawhnu dar 1:00 khan State Playfield Association of Mizoram (SPFAM) chuan I&PR Conference Hall-ah Executive Meeting neiin Mizorama play field (infiamna hmunhma) hrang hrang nekchep leh tihral ni mek zel humhalh kawnga hmalak zel dan tur relin an thukhawm.

Pu Hmingdailova Khiangte, Parl.Secretary, Sports chuan he meeting hi a kaihruai a, Pu C.Laltlanthanga, Member Secretary chuan report pein Mizoram pumah playfied 600 chuang zet a awm thu leh SPFAM-ah an register thute, kum bithliah awm lova tu pawhin an hman theih tur vantlang infiamna humhalh chu an thupui a nih thu a sawi a. SPFAM chu kum 2011-ah Mizoramah din a nih thu leh Ministry of Sports-in Rs.50 lakh an pek hmanga hmalakna engmawzat kalpui a nih tawh thu a sawi bawk.

Pu H.Thangchungnunga, SPO, MSSC chuan State Playfield Association of Mizoram din chhan leh thiltumte sawifiahna hun powerpoint presentation hmangin a nei a. National Playing Field Association chu kum 2007-ah dinthat a nih thu te, 3rd June 1865-a King George V hova National Playing Fields Association chu UK-ah din a nih tawh thu a sawi bawk.

Mizoram mai ni lo, India leh ram changkang zawkah te infiamna hmun-hma- flayfield tam tak a riral tawh thu leh Mizoram pawhin harsatna a tawh tan mek tawh tawh dan leh chung hmunte chu humhalh mai ni lo, chei that leh enkawl zui zel an tum thu te, taksa hrilselna atana exercise lakna hmun leh infiamnna tur hrim hrimte, park leh hmun awl tha siama enkawl zuite, hetiang lam kawnga mipui zirtirna tha pek thlenga hmalakna neih a nih tur thu a sawi bawk a ni. State Playfield Association of Mizoram-ah hian Pu Zodintluanga, Minister Sports & Youth Services chu Chairman a ni a, Pu Hmingdailova, Khiangte, Parl.Secretary, SYS chu Sr.Vice Chairman niin Pu H.L.Rochungnunga, Secretary SYS chu Vice Chairman a ni a, Pu C.Laltlanthanga, Secretary, MSSC chu member Secretary niin Ex Officio member 14 leh nominated member 18 an awm bawk.