Vawiin khan CM Conference Hall,Macdonald Hill Zarkawtah Health Minister Pu Lal Thanzara hovin Mizoram Institute of Medical Education & Research leh State Referral Hospital,Falkawn ( MIMER ) chungchanga hmalak dan leh tun thlenga a dinhmun sawiho a ni a.Health Departmenta officer te bakah Planning leh Finance, DP & AR,PWD,PHE,P& E Department hotu te an tel kim hle.
Medical College din tum na ah hian hmalakna thui takin a kal mek tawh a, chutih laiin harsatna leh sukukna tawn chhoh tur a awm veleh thin bawk,hemi chungchang sawikhawm leh thlirho tura meeting pawh tul hle mahse duh anga hun remchang a awm theih thin loh thu meeting kaihruaitu Pu Lal Thanzara chuan sawiin ram tana thil tha leh pawimawh tak Medical College din tur hian Health Department in a tivek thei lova, a hlawhtlinna tur chuan Department hrang hrang Planning leh Finance, DP & AR,PWD,PHE,P&E leh Department dangte nena tanrual a ngaihthu a sawi a.Thil lian tham MIMER nei turin sual chhoh mek a ni a,hmalam chin hriat a ni lovin sawi lawk theih ani lova,hlawhtling ngei tura kalpui a ni a, Mizoam sorkar in theihtawp chhuah mahse Central lam hotute remtih zel angaih avangin engemaw vanga a lo puitling thei ta lo palh anih pawhin Damdawi in tha tak leh changtlung tak chu sual chhuah ani hrim hrim ang,chumi atan chuan Sorkar pawhin theihtawp chhuah a tum thu Health Minister chuan a sawi bawk.
Hemi chungchang bawhzuia tun hnaia Central Sorkar dawra kal Pu Lalrinliana Commissioner Health Department leh Dr Jane R Ralte State Nodal Officer ( MIMER ) te chuan report kimchang takin an pe a.Sum hman tur ah Central lam in an rawn tum dan tur leh Mizoram Sorkarin a lo tum ve tur chin leh mamawh phuhruk ve tura helam pawh theihtawpa tanlak a ngaih thu ngaihthlak a ni a. Medical College din tura hmalakna kal lai rawn endiktu MCI ( Medical Council of India ) te pawhin hmalakna kalmek hi endik tlakah ngaiin enfiah tura Mizoramah an lo kal tawh thu leh an duhdan ang zela kalpui a tul thu te,a building bakah thawktu leh damlo awmna tur room hrang hrang leh khum leh mamawh dangah MCI duhdan puitlin turin Mizoram Sorkara Department hrang hrang te chu theihtawpa tanho a ngaih dan te sawiho ani.
