Vawiin khan Parish Hall ah MHIP General Headquarters, MHIP Sub-Headquarters, Kolasib leh Health & Family Welfare Department tangkawpte chuan Infant Mortality Rate (IMR) leh Maternal Mortality Rate (MMR) tihhniam dan tur leh a pawimawhna te zirhona an buatsaih a, he programme hi Kolasib DC Pu H. Lalengmawia, IAS chuan a hmanpui a ni.

Pu H. Lalengmawia chuan nausen pianghlim boral Infant Mortality Rate leh nu raicheh a thi Maternal Mortality Rate te hi nu naupai te hriselna dinhmun a that tawk loh vang anih rualin nu naupai te hi rilru hrehawm lova, hahdam taka an awm leh an khawsak a pawimawh thu a sawi a. IMR leh MMR tla hniam tur chuan nu naupai te tan an chenna chhehvel boruak kawng tin rengin a hrisel leh a thianghlim a tul a, chu mai chu a la tawk lova an chhung lam rilru thleng a hrisel a pawimawh, a ni a ti a. Nu nau pai te hi an rilru a hah a, hrehawmna phurrit an ngaituahnaah an awm chuan, an nau paiah nghawng tha lo tak neiin an naupai leh an mahni thlengin an dinhmun a ti der thawng thei a. Chuvangin nu naupai te hi an pawn lam hriselna chauh nilovin an chungril hriselna thleng an chhungten an ngaihthah tur a ni lo a, rilru hahdam taka an awm theih nan kawng tin renga an puih a pawimawh a ni, a ti bawk.

MHIP pawh hetiang lam zirtirna leh sawihona hi vawiin programme ah duh tawk mai lovin an nitin titi-ah a tam thei ang ber IMR leh MMR chungchang hi sawichhawnga midang te zirtir turin MHIP memberte a chah a ni.

Thusawitu dang MHIP Headquaters President Pi Lalthlamuani chuan Health & Family Welfare Department in IMR leh MMR chungchanga zirhona buatsaih turah MHIP an rinngam leh an thawhpui avangin lawmthu a sawi a. Hetiang zirtirna hi District khawpui tinah an buatsaih chho mek zel a, May thla chhungin Serchhip leh Champhai ah pawh an buatsaih leh tur thu a sawi bawk.

Vawiin programme ah hian Dr. James RE Mawia, Gynecologist, DMS, Kolasib Hospital; Dr. Lalhlimpuia, CMO, Kolasib District leh Pi Malsawmzuali, District Programme Coordinator, National Programme for Prevention and Control of Cancer, Diabetes, Cardiovascular Disease and Stroke (NPCDCS) te chuan kalkhawmte hi IMR leh MMR chungchang, a pawimawhna leh a tlakhniamna atan zirtirna an pe a. Zawhna leh chhanna hun hman a ni bawk.

IMR hi nausen pianghlim boral tehfung niin MMR hi raicheh a thi tehfung a ni a. IMR leh MMR hi mihring 1000 zelah chhut a ni a.