2960/2023-2024

Khawzawl, 7th December 2023: Vawiin khan Pusa Ground, New Delhi-ah ‘MILLIONAIRE FARMER OF INDIA AWARD 2023’ semna neih a ni a. Mizoram atangin District pali a kuthnathawktu ten he award hi an dawng a, chungte chu - Pu KB. Sangkhuma, Rabung, Khawzawl District; Pu M. Hrangmawia Siata, Siaha District; Pu VL Remruatpuia, Darlak, Mamit District; Pu Vanlalfela N. Vanlaiphai, Serchhip District te an ni. Award dawngtute hi Mizoram KVK ten nomination an siam atanga an thlan chhuah an ni a. He program hi Krishi Jagran te chhawp chhuah niin, Mahindra Tractor ten an sponsor a ni.

Khawzawl District atanga he award dawngtu Pu KB.Sangkhuma hian Sawhthing, Fu leh Silk pangang khawiah te hma lain, kum 2023 hian hian Sawhthing 70 quintal lai chingin a tlem berah 400-500 quintal a thar beisei a ni a; heng a hmalakna atangte hian he Award hi a dawng a ni. Siaha District atanga dawngtu Pu M. Hrangmawia hian Sial, Bawng, Vawk, Kel, Beram leh Ar vulhin hma a la a, tunah hian sial hi a note nen 250 vel neiin, Sangha dil lian tak tak 5 atanga sangha tam tak thar chhuah leh a ranvulh dangte avangin he Award hi a dawng a. Mamit District atanga dawngtu Pu VL Remruatpuia hian zirna a MBA a zawh hnuin Bawng vulh leh Sangha dilah te hma lain a thar chhuah te atangin he award hi a dawng bawk. Serchhip District atanga Award dawngtu Pu Vanlalfela hian Sunhlu chi hrang hranga a sawngbawlna atangin he award hi a dawng thung a. Pu Vanlalfela hian an khua-a Sunhlu tam tak awm chu engemaw taka siam chhuah theih anih ringin theihtawp chhuahin a bei a, tunah hian Sunhlu candy, Sunhlu powder, Sunhlu den leh sunhlu oil te siam chhuak in eizawn nan a hmang mek a ni.