2516/2022-2023 

Aizawl, the 2^nd November 2022 : Vawiin khan Mimbung khuaa VC House, Panchayat Bhawan ni bawk leh MzSRLM hnuaia self help group intelkhawm, Village Organisation (VO) office sak thar te chu Pi Margaret Lalrinawmi Fanai, MCS, Addl. DC, Saitual leh Project Director, DRDO, Saitual ni bawk chuan a hawng.

Building 2 hawnaah Pi Margaret Lalrinawmi Fanai chuan thu sawiin, Mimbung khua chu ramri hrula awm, Mizoram hmel lanna darthlalang a nih thu te, ramri vengtu pawimawh tak a nih thu a tarlang a. Hun lo kal zel turah Sawrkar hmalakna hrang hrang lo thawhpui a, lo tawiawm tur te, taima taka mahni hmazawna tih tur awm te hlen chhunzawm zel tur leh ruihhlo, a bik takin No.4 do na kawngah theihtawp lo chhuah chhunzawm zel turin kalkhawm te a sawm a ni.

Heng building pahnih hawnna inkhawm hi Pu Thanghuliana, VCP, Mimbung in a kaihruai a. Pi Manngaihdawni, MHIP President in hunserh hmangin, VC Secretary Pu Ginsuanlian leh Pi Dengropari, VO secretary ten report an pe a, Pu Thuamrosanga, VC Vice President chuan lawmthu sawina hun a hmang bawk.

Heng In 2 hawnna inkhawmah hian Pu Vanlaltanpuia, SDO(civil)/BDO, Ngopa te, Pu Andy Lalfakzuala Varte, SDO (Sadar), Saitual; Pu PC Lallawmkima, Rural Accounts Officer, DRDO, Saitual leh Pu R. Zodinsanga, Block Mission Manager, MzSRLM, Ngopa leh sawm bik mi eng emaw zat an tel.

Panchayat Bhawan hi Local Administrstion Department hnuai, XV Finance Commission Grant aṭanga nuai 10 hmuh leh MGNREGS aṭanga nuai 10 hmuh hmanga convergence a sak a ni a, a zavaiin nuai 20 sen a ni. Village Organisation office erawh hi chu Sialkal Range Development Council sum, cheng nuai 5 hmanga sak a ni thung.