Vawiin hian Minister of State for Fisheries, Dr. BD Chakma chuan Ngengpuia Sangha chi tharchhuahna hmun tura buatsaih chu a tlawh a, chak zawka hnathawh dan tur leh hmalak dan tur a enfiah.

Thusawiin Minister chuan Lawngtlai District chu Sangha leh Pangang tharchhuah theihna hmunhma tha tak nei a nih avangin sawrkar in a ngaihven hle a, chak taka hmalakna kalpui zel a ni ang a ti. Hetihlai hian District Council hote nena thawhhona tha tak neih chu hmasawnna kawngah a tangkai hle a, tha taka lo thawkho turin ka duh che u a ni tiin Department-a thawkte a fuih bawk.

Minister in vawiin a Ngengpui lui kama Sangha chi tharchhuahna hmun a tlawh hi kum 1989 atanga bul tan tawh niin hun rei tak tha taka kalpui a nih hnuah a lo hlui tak deuh avangin kum 2012 atang khan NLUP hnuai atangin Cheng nuai 5 senga siam thar leh a ni a, kum khata Sangha no nuai 6 thar chhuah theih tura siam a ni leh tawh a ni. Amaherawh chu tuilak tur duhthusama tha a awm rihloh avang leh tuikhuah thenkhatah tuiput a awm avangin a dil hi tih ruah rih a ni a, hengte hi siamthat a nih hunah tha taka kalpui theih beisei a ni.

Minister hian Ngengpui a Sangha Chi siamna hmun a tlawh hma hian District Sericulture Office leh District Fisheries Development Office te a tlawh hmasa a, District Office ten mamawh an neih leh an harsatna te a enpui hlawm a ni.