Vawiin tlai lam dar 3:00Pm hian Minister of State for AH & Vety Pu C. Ngunlianchunga chuan Lawngtlai bul Mampui khuaa Vety Complex ah Vawkpa chi sawngbawlna hmunpui (Boar Semen Station) a hawng.

A hawnna inkhawm ah thusawiin Minister chuan Vawk kahrai hi AH &Vety chuan kum 2000 vel atang khan a lo kalpui tan tawh a, khawvel ram changkang zual deuhte chauhvin vawiin ah hian hetiang tihna hmun hi an la nei thei ani, India sawrkar meuh pawhin tunah hian Central Research Farm ah an la zirchiang ve mek chauh a ni a ti. Mizoram bikah chuan AH & Vety a thawktute thawhrimna avangin kum 10 aia tam kalpui a lo ni ta a, vawiinah phei chuan Aizawl leh a chhehvel mai nilovin District zawng zawng ah pawh kan lo hawng ve leh ta zel a, hei hi hmasawnna ropui tak a ni a ti.

Minister chuan, hetianga Vawkpa chi sawngbawlna kan lo neih takah chuan vawk vulha eizawng ten vawkpui rai tir tura harsa taka a pa an hruai leh an kaih a ngai tawh dawn lova, sum tam tak an sen thin pawh a lo bo thei tawh dawn a, mirethei zawkten kan chhawr tangkai hle in a rinawm tiin a sawi bawk.

Vawiina a hawnna inkhawm hi Dr. Lalnunhlima Ralte, District Vety Officer in a kaihruai a, Pu V. Zirsanga, CEM LADC chu khualzahawm niin, Dr F. Laltanpuia, Assistant General Manager in kalkhawmte hnenah lawmthusawina hun a hmang thung. Kalkhawmte zingah hian LADC atangin Executive Member thahnem tak leh District Officer te bakah chanchinbumite an tela, tlai lamah zanriah tuihnai tak an kilho nghal a ni.