No114/2021-2022

Aizawl the 13th April, 2021 : Vawiin khan SAD Conference Hall, MINECO ah AH&Vety Minister Dr K.Beichhua hovin African Swine Fever chungchanga hmalak dan tur ngaihtuahin meeting pawimawh neih a ni a. Report dawn chinah vawiin thleng hian Mizoram chhung hmun hrang hrangah vawk pul hri avang hian vawk 671 an thi tawh a ni.

Vawk pul hri leng mek hi ASF a ni ngei em tih finfiah turin National Institute of High Security Animal Diseases (NIHSAD), Bhopal ah April ni 8 khan sample thehluh a ni a. Laboratory-ah PCR hmangin heng sample te hi ASF positive tih hmuhchhuah a ni tawh a. Mahse, a serotype hriatna turin genome sequencing tih leh a ngai a. Niminah tih tan niin result hi Nilaini emaw Ningani ah hriat theih beisei a ni. NIHSAD, Bhopal hian ASF a ni tih an nemngheh chuan sawrkar laipuiah an report ang a, Mizoram state chuan sawrkar laipuiin dan ang taka an puan hun a nghak a ni.

Mizoram chhungah infected area-a puan tawh te chu Lungsen, Lunglei District; Electric Veng, Lunglei; Zawlnuam, Mamit District bakah Edenthar leh Armed Veng, Aizawl te an ni. Lungsenah tukin thleng khan vawk 431 an thi tawh a, Mamit District-ah 117, Edenthar ah 73, Armed Veng ah 42, Electric Veng Lungleiah 8 an thi tawh a ni.

Vawiin meeting-ah hian Chief Secretary Pu Lalnunmawia Chuaungo bakah sawrkar department hrang hrang hotulute an tel a. Khawvel ram dang leh India ram chhung ngeia vawk nuai tam tak suattu hi Mizoramah a lo luh ve tak avangin engtia hmalak chhoh zel tur nge tih ngaihtuah a ni a. He vawk pul hri darh chak tak hi enkawl dam theih a nih loh avang leh vaccine a awm loh avangin Mizoram pumah a darh lohna tura rang taka inven a ngai a. AH&Vety Department-in ruahmanna a siam te thlir ho niin hmalak dan tur an ngaihtuah a. COVID hri leng ang bawkin sawrkar chauh ni lo, mipui mimir tan tlan a ngai nasa hle dawn niin meeting-ah hian sawi lan a ni.

ASF hi vawk thi tawh leh vawksaah rei tak a nung thei a. ASF vanga vawk thite hi halral emaw thuk taka phumbo an nih loh chuan an ruang emaw saah rei tak chhung a nung a ni. Frozen meat/ processed meat ah te, vawksa repah te pawh rei tak chhung a dam thei a. Mihringah natna thlen lo mahse vawk vulhtu mihring te hi a thehdarhtuah an tang thei. Vawk leh vawk in contact (in ngheng tawn) atanga inkaichhawn a ni ber a. Sanghal te pawhin he natna hi an kaiin an thehdarh thei bawk a ni.

He natna laka inveng turin hri lenna hmun atangin vawk, vawksa leh vawksa atanga siam ei tur reng reng lak luh loh tur a ni a. Ran in leh a chhehvel te damdawi hmanga tih thianghlim thin tur a ni. Vawk, Vawk in leh a chhehvel a saphihrik te an awm theih loh nan damdawi (insecticide) hmanga tihbo/ven thin tur a ni a. Ran enkawl tu bak ran inah luh tir loh tur a ni. Ran chaw pekna hmanrua leh a chaw phurh nana hman lirthei te tih thianghlim thin tur a ni a. Chaw ningnawi atanga thehdarh theih a nih avangin pek loh hram tur, kan pe dawn a nih pawh in darkar chanve tal chhum so tur a ni. Ui, zawhte, ar (pet animals) te ran damlo awmna hmunah luhchhuah tir loh tur a ni a. Ran thi reng reng uluk taka damdawi nen phum bo ngei tur a ni bawk.