781/2022-2023
Aizawl, 4th June, 2022 : Mizoram hmasawnna tur kawng hrang hrang ngaihvena phai lama zin mek Dr R. Lalthangliana, Health & Family Welfare etc., changtu Minister chuan nimin chawhnu khan Mizoram sawrkarin New Delhi-a damlote enkawlna man bill theihna tur atana a thlan damdawi in thenkhat a tlawh. Minister hian damdawi in pathum - Max Super Speciality Hospital, Fortis Escort Hospital leh Indraprastha Apollo Hospital te a tlawh a, heng a tlawhnaah hian damdawi hotute leh daktawrte nen inkawmna hunt ha tak an hmang a ni.

Heng damdawi in hotute nen an inkawmnaah hian Dr R. Lalthangliana chuan Mizoram atanga anmahni rawn pantu damlote hi mi chi hrang hrang dinhmun in ang lo tak tak an nih thin thu sawiin, then khat chu tawng thiam lo leh sum leh pai lama harsatna neite an nih thin avangin hriatthiamna thui tak nen lo dawngsawng thin turin a ngen a, damlo nunna chan leh chhiat tawhna dang avanga nunna chante ruang Mizorama thawn haw ngai a awmin post mortem leh damdawi in lamin an tihfel ngaite nghah chhung a rei thin a, thlawhtheihna a ruang thawn a nih dawn phei chuan hmanhmawh leh hnawhsarum taka thil tih a ngaih thin avangin a buaithlak a, Mizote hi mitthi an awmin inngaihsak leh inbuaipui nasa thin hnam kan nih bawk avangin damdawi in tualah te rei tak tak ruang nghah a ngai thin a, hetiang thilah hian a awlsam zawnga thil tihfel sak zung zung thin turin a ngen bawk a ni.

Minister hian damdawi in hotute hnenah hian Mizoramah daktawr thiam super specialist kan la neih tlem thu sawiin department pawimawh thenkhatah phei chuan tumah kan nei lo a ni, a ti a. Damlo tam tak New Delhi pan thei lo an awm bakah Mizoram State Health Care Scheme in a cover loh sum tam tak sen ngaihna a awm thin a, a bik takin department pawimawh Mizo damlo tamna Cardiology, Cancer, Nephrology, Neurology, Endocrinology etc., a an daktawr thiamte Aizawlah rawn tira free clinic rawn nei tura a ngenna chu damdawi in hotute hian tha an tih thu leh a tih theih dan tur an ngaihtuah dawn thu an lo hrilh a ni.

Heng bakah hian Dr Thangtea chuan a chunga tarlan tak department pawimawhah te daktawr kan neih mumal loh thu sawi nawn lehin PG zir tur hian tlin a har bakah a zir chhung a rei bawk thin avang leh tuna Mizorama kan natna tam ber kaihhnawih department an nih si avang hian Mizorama kan daktawrten an heng natna chungchanga a pawimawh zual, Aizawl lama lo inenkawl ve theihna tur khawpa thiamna an neih theih nan an damdawi inahte training an pek theih chuan heng natna a basic knowledge tal an nei ang a, Mizoramah pawh awmzia a nei thei ang ti a a ngenna pawh chu tih hlawhtlin tha an tih thu an sawi a, Mizoram House a sawrkar official te thu leh hla chu Mizoram sawrkar thu leh hla tluk a nih thin avangin damlo an buaipuina leh thihna chungchangah lo ngai pawimawh thin turin a chah bawk a ni.

Minister hi DRC, Mizoram House, New Delhi leh Mizoram House a thawk nurse ten an a tawiawm a ni.

Nimin tlai khan Dr Thangtea chuan NITI Aayog member Pu Vinod Paul, damlohna avanga in lama inenkawl mek chu a tlawh a, thilpekte hlanin Mizoram tan, a bik takin Health & Family Welfare department tana thil tam tak a tih sak tawhna ah lawmthu hrilhin a dam leh thuai theih nan duhsakna a hlan a ni.

Dr Thangtea hian tukin khan New Delhi atangin Mumbai a thleng thla a, vawiin chawhnu dar 2:30 khan Mumbaia cancer damdawi in lian Mizote pan ber Tata Memorial Hospital tlawhin damdawi in hotute nen an inkawm a, hetah hian Dr Thangtea chuan cancer natna vei Mizo damloten harsatna an tawh chi hrang hrangte sawiin, damdawi in lamin an tih sak theih tur angte sawiho a ni a, Mizoramin JICA tanpuina a Cancer Superspeciality a din tur thu pawh sawi langin a hlawhtlin hun tur hi kum 2028 daih a nih vangin kum 6 zet nghah a la ngai a, Mizoramah cancer vei damlo tam tak Mumbai pan ve thei lo an awm bawk si a, TATA Memorial Hospital-a daktawr thiamte Mizorama a khat tawka rawn chuang chhuaka damloten an rawn theih tura rawn in chhawp hnai thin tura a ngenna chu tihhlawhtlin dan an zawn tur thu in an lo chhang a, nimin lama New Delhi damdawi in thenkhat a tlawh tuma a thu thlen te kha Tata Memorial Hospital hotute hnenah hian thlen lehin anni pawhin a theih ang anga hmalak an tum thu an sawi a ni.

Minister hi DRC, Mizoram House, Mumbai, Mizoram House a thawk nurse leh staff thenkhatin an tawiawm a, Dr Thangtea hian Mizoram House Mumbaia cancer natna vanga inenkawl mekte leh anmahni awmpuitute chu zanin hian inkawmhona hun neihpuiin zanriah a buatsaih sak dawn bawk a ni.

Dr Thangtea hian vawiin chawhma khan Mumbaia National Council of YMCA of India rorelna sang National Executive Committee Meetingah YMCA North East Region Chairman a nihna angin a tel a, he hunah hian thusawina hun tha tak neiin YMCA India ram hmun danga a than duan laia hmar chhak lama a thang chak lo chu a vei thu leh National Council pawhin ngai pawimawh turin a ngen a, Kristian tamna State a rin aia a thang chak lo chu rawn tlawh tama, tanpuina pek chungchangah pawh duhsak deuh tura thlenin thawhhona tha a pawimawh thu a sawi a, naktuka National YMCA General Body Meetingah thu a sawi leh ang.