515/2023-2024

New Delhi, 19th May, 2023 : New Delhi-a cham mek Dr R. Lalthangliana, Minister i/c Health & Family Welfare, Commerce & Industries, Higher & Technical Education chuan a Department kaihhnawih hmachhawp hrang hrang chungchangah sawrkar laipui mi pawimawhte a kawm.

Minister hian Niti Aayog member (Health) Dr V.K. Paul chu kawmin Mizorama rawn zin turin a sawm a, Dr V.K. Paul hian tun thla tawp May ni 30 hian Mizoram rawn tlawh theih a inbeisei thu leh Zoram Medical College, Falkawn bakah May ni 31 hian Health & Family Welfare, Commerce & Industries leh Higher & Technical Education official te nen inkawmna hun nei turin ruahmanna an siam a ni.

Minister hian Union Agriculture & Farmers’ Welfare Secretary, National Bamboo Mission enkawltu ni bawk Pu Manoj Ahuja pawh kawmin 2006-2007 daih tawha Mizoram puma District-wise Resource Mapping kan tih hi a hlui tawh deuh avangin a thara siam that sak vek turin a ngen a, ani chuan tha a tih thu lo hrilhin sum sen ngai ang ang pawh tihsak vek a lo intiam a, Mizoram Remote Sensing Application Centre leh data te a thara kalpui tum a nih thu leh hemi atan hian sawrkar laipui atanga technical mi, mithiam rawn thawn a tum thu a lo sawi a ni. Dr Thangtea chuan Bamboo Development Agency, Mizoram hmalaknaa thilsiam chi hrang hrang zinga mi agarbati stick chu thildanga thlak sak turin a ngen bawk a, duhaia a hlawk loh avangin mau hmanga siam thildang - toothbrush etc., siamchhuah a lo phalsak a ni. Mau hmanga eizawnna ngelnghet siamna kawnga hmalakna chin hrang hrang te an sawidun a, eizawnna atana hmangtuten samkhai leh rip lutuk lova hma an lak theih nan tanpuina (subsidy) ngaihtuahsak tura a thlen pawh Pu Ahuja hian lo ngai pawimawhin tihhlawhtlin ngei a tum thu a lo hrilh a ni. India ram pawn hmun hrang hranga mau hnah atanga thingpuife (tea-making) an siamchhuah ang hi Mizorama tih ve dan kawng zawn Minister hian rawt bawkin Pu Ahuja chuan a lo ngaih pawimawh sak hle a ni.

Hemi hnu hian Minister hian Ministry of Health & Family Welfare Joint Secretary (Malaria) Pu Rajiv Manjhi tlawhin Zoram Medical College tan auditorium cheng vaibelchhe 35 man hu sakna tur Union Minister Pu Mansukh Mandaviya hnena a thlen tawh chu lo umzui sak turin a hrilh a, heng bakah hian thil pawimawh chi hrang hrang an sawi dun bawka chung zingah chuan Mizorama malaria vanga nunna chan an la awm zeuh zeuh chungchang telin malaria tamna districtah te nasa lehzuala hmalakna tur te a tel a, hemi chungchangah hian Pu Rajiv Manjhi hi thla thar June ni 1 hian Mizoram rawn tlawh turin an sawifel nghal bawk a ni. Minister hian malaria umbo beihpui thlakna tur atana mamawh chi hrang hrangte a thlen nghal a ni.

Hemi hnu hian Forest Ministry tlawhin Minister hian Inspector General of Forest Pu Ramesh Pandey a hmu a, National Institute of Technology (NIT), Mizoram dinna tur hmunhma Lengpuia mi chungchangah rei tak chhung forest clearance hmuh loh vanga hmalak theih loh chungchang a sawipui a, khunkhan taka an sawidun hnuah Pu Ramesh Pandey hian forest vlearance hi a lo tihfel sak nghal a , minister pawh hian lawmthu a hrilh nghe nghe a, hemi chungchanga sum chawi ngai pawh Ministry of HRD in an chawi vek dawn a, Mizoram sawrkar chawi tur a awm lo a ni. Hei bakah hian Dr R. Lalthangliana chuabn mizorama project lian tak tak kalpui mekah forest clearance ngai a awm thin avanga hmasdawnna hnathawh sukuk a awm thin chu pawi a tih thu thlenin engemawchen chu ngaihnathiamna nen lo en thin turin an ngen bawk a ni.

Dr Thangtea hian Max Hospital tlawh chhunzawmin an Medical Director Dr Gurpreet Singh leh a thawhpui te nen an inkawm a, Mizoram Atanga anmahni pan thintu damlote an lo dawnsawn danah lawmthu hrilhin damlo retheite leh tawng thiamlo te an kal chang pawha ngaihhnathiamna nen an lo dawm hram hram thinnaah lawmthu hrilhin lo chhunzawm zel turin a chah a. Natna chi hrang hrang Mizorama daktawr thiam chungchuang bik kan neih rih lohna natna chi hrang hrangah Max Hospital daktawr thiamte Mizorama rawn tira inentir hun buatsaihsak turin a ngen a, heng bakah hian Mizorama daktawr te a tul anga training a thlawna lo pe turin a thlen bawk a, an lo ngaih pawimawhsak hle a ni.

Vawiin tlai khan Border Roads Organization Director General Rajeev Chaudhary kawm bawkin Lunglei leh Lawngtlai district inkalpawhna atana pawimawh tak Tuipui ‘D’  Darzo kai lei dawh tur chungchang a sawipui a, Pu Rajeev hian clearance an tihfel balah tender an koh tawh thu lo hrilhin a khawihtu tur contractor pawh June thla ral hma a thlan fel an inbeisei thu a lo hrilh bawk a ni. He project hi cheng vaibelchhe 90 hu niin July thla chuan hna tan theih beisei a ni. Heng bakah hian minister hian North Vanlaiphai – Thingsai - Pang khua inkalpawhna BRO hovin an laih mek chu rang taka thawh zawh sak turin a ngen bawk a ni.