1087/2022-2023
Aizawl the 29th June, 2022 : Vawiin khan School Education Minister Pu Lalchhandama Ralte hovin Mizoram Presbyterian Kohhran Hmeichhe Inkhawmpui lian 2023 Darlawn-a thlen dan tur Organising Committee-te nen BRCC Hall, Darlawnah sawiho a ni.

Minister chuan he hunah hian thusawiin Zoram Kohhran Hmeichhe Inkhawmpui lian 2023 Darlawna neih tur chu hneh taka lo thlen tum anih thu te, Darlawn khaw chhung pawh a theih ang anga chei anih tur thu a sawi a. Inbuatsaih nan hun tawite la awmah sorkar department hrang hrangten a theih ang anga țan an lak tur thu a sawi. Minister chuan vengchhung faina leh inthiarna lamah pawh nasa taka țan lak a tul thu te, mipui che vel himna leh awlsamna atan kawngpui bula bungraw dah hnawk loh te, a theih ang anga vengchhung tihfai pawh a țul thu a sawi a. Mikhual thleng thei tura chhungkua tinte lo inbuatsaih a tul thu te a sawi.

Minister ho hian inkhawmpui neihna tur  Darlawn field chu a hmunah an tlawh a, Pandal sak dan tur leh lirthei hmanga palaite chet dan tur te an thlir a. Department hrang hrang PWD, PHE, Rural Development leh UD&PA  hotuten Darlawn vengchhung chei dan tur leh hnathawh dan tur a hmunah an en nghal bawk.

Hmeichhe Inkhawmpui lian thlen dan tur sawihonaah hian Darlawn Pastor bial pahnih ațanga ruat Organising Committee member-te, khawtlang hruaitute, Darlawn Block huamchhunga Department hotute an tel a ni.