No.7420/2020-2021

Vawiin khan Power & Electricity changtu Minister Pu R Lalzirliana'n Saitual DC Bangla ah Urban Development & Poverty Alleviation Department in Khaw Fai Inelna 2020 an buatsaihah Saitual in lawmman pahnihna an lak lawmna hun tawite neih chu a hmanpui.

Pu R. Lalzirliana chuan District khawpui thar Saitual in Mizoram pum inelnaah lawmman 2 na an la nghal thei chu lawmawm tiin hei hi khawtlang hruaitute, tlawmngai pawl hruaitute leh mipuiten DC kaihhruaina hnuaia lungrual taka an thawh rah a ni a,  Mizoram huapa Saitual a lang hi ka chhuang hle a ni, a ti. Minister chuan faina leh thianghlimna hi mahni inchhung atangin kan inzirtir a ngai a, keimahni lamin  kan zir hmasak chuan pawn lama kan teichhuah hunah pawh kan rilru in faina hi a vawng reng thin a ni, a ti a. Faina chungchang midang zirtir turin mahni entawntlak nih phawt a tul tiin a sawi bawk.

Pu R. Lalzirliana chuan tha thlah lova kum tluana Saitual leh District mipuite chu faina ngaipawimawh a, hma la zel turin a chah a. An hmalakna tha tak chu chhunzawm zel turin a chah bawk a ni.

Hun kaihruaitu Saitual DC Pu V L Hruaizela Khiangte chuan lawmman an dawn chhan chu mipuite thawhhona rah a ni a ti a. Saitual District Urban Development Officer Pu R.L. Zidinga'n hma an lak dan tlangpui a report bawk a ni.

Saitual in Khaw Fai Inelna 2020 ah khan Category I District khawpui fai ber thlanna ah lawmman 2-na an dawng a. District khawpui leh khawpui dangte khaikhawma a fai ber thlanna ah pathumna dinhmun an hauh bawk a ni.

Lawmman sumfai an dawn atangin Saitual Town Area huam chhunga VC 9 te hnenah lawmman Token Money chu Minister in a hlan a ni.