3511/2023-2024

Aizawl, the 25th, 2024 : Vawiin chawhma khan Directorate of Land Revenue & Settlement Conference Hall-ah Revenue Minister Pu B. Lalchhanzova hovin LR&S Department a thawktute chuan kum 2024 kumtir a inhlantharna hun an hmang.

He hunah hian Revenue Minister chuan Revenue Department hnuaiah hna hautak leh uluk taka hmachhawn tur tam tak an nei tih a sawi hmasa a.Delhi-ah hna pawimawh a zin thu sawiin he hunah hian Dept of Land Resources a dawr chungchanga Delhi lama hotute an inhawn zia te a zuk hmu chuan phurna a pek thu leh Mizorama Revenue Department pawhin tan lak a ngaih thu a sawi a ni. LR&S chu mipui mimir, sawrkar leh pawl anga mamawh nitina lo thawktu an nih anga an mawhphurhna pawimawhna te a sawi bawk a ni. Revenue Minister chuan a department a thawktute chu department hmasawnna kawng leh mipui rawngbawlna tha zawka an thawh theih nan ngaihtuahna seng turin a chah a, hemi kawngah hian a puihna an mawmawhna apiangin a in hawn reng thu a sawi bawk.

Pu B.Lalchhanzova chuan Assam Rifle ram chhuahsan tura mimal ram nei surrender tawh te chu an fakawm tih a sawi a. Lawmthu sawina lehkha ziak pekvek a tum thu a sawia, la surrender lo te pawh a mal mala kawm a, chinfel dan zawn pui a duh thu a sawi bawk a ni. He hunah hian House Pass dilna Minister kaltlang kher a lak a ngai thin chu Pu B. Lalchhanzova chuan mipui tana harsatna a thlen tam zawk ni a a hriat avangin, a tih tawp thu a sawi a, Director kuta a hlan thu a sawi.

Surveyor indaihlohna phuhru turin survey hna outsource na tur pawh peihfel tawh niin EOI tih chhuah mai theih a ni tawh tih Minister hian a sawi bawk a. Property registration leh thil tul danga hman turin E-stamping rules pawh duan mek a nih thu sawiin hei hian mipui tan awlsamna a thlen bakah stamping atanga sawrkar sum lak luh pawh a pui hle dawn a ni a ti.

Land Revenue & Settlement Department inhlan tharna hun hi Pu C.Lalringliana , Jt Director (Survey) chuan a kaihruai a.

Pu K. Vanlalthiana, Director, LR&S fuihna thu a sawi hnuin Pu Lalhmansanga , Jt Director in lawmthu sawina hmangin hun a ti tawp a ni.