DIRECTORATE OF INFORMATION & PUBLIC RELATIONS, Government of Mizoram, India

Vawiin chawhma dar 10:00Am khan School Education Minister Pu H.Rohluna'n cheng nuai Rs.244.85 senga sak DIET (District Institute of Education and Training),Siaha Building thar a hawng.

DIET Siaha Building thar hawnna inkhawm hi Pi.Laldawngliani Chawngthu, Director SCERT in kaihruaiin, Pu H.Rohluna Hon'ble Education Minister leh Pi.Esther Lal Ruatkimi, Commissioner & Secretary, School Education Dept, ten khuallian leh khualzahawm niin an telpui.

Khuallian Minister Pu H.Rohluna chuan DIET building thar 6 sak zingah a hla ber DIET Siaha hawn hmasak ber a nih leh a hawngtua atang chu lawmawm a ti thu sawiin, Minister chuan Hmarchhak State te zinga Mizoram DIET-ah chiah hian B.Ed zirna a la awm a. Chu chauh nilovin hmarchhak state dang ten an nei loh pianphunga rualban lo te tan pawhin B.Ed Special Course zirna SCERT hnuaiah a awm a.Hei hi Zirna lama Mizoram hma ka sawn tawhzia lanna pakhat a ni, a ti a. Education a hma ka sawn theih nan Zirlai naupang leh nu leh pa an pawimawh rualin, a pawimawh ber chu Zirtirtu te an ni, a ti a. Vawiin kan Zirtirtute tuaitharna leh tahhriamna tur hmunpui DIET building thar kan hawn hian kan Trainees te leh faculty member te rilruah kan ram zirna tih hmasawn leh a standard tisang turin phurna, inpumpekna leh chona thar pe che u se la, DIET building thar hian hmasawnna kawng thar zawhtir mawlh che u rawh se, tiin faculty member leh trainees te duhsakna a hlan bawk.

Minister Pu H.Rohluna chuan Siaha District in Sawrkar ni pawimawh Independence Day leh Republic Day lawmna programme-ah te a hman tur Pipe Band kan nei lo chu a vei hle a. Aizawl a thlen ve leh lo bawhzuia Pipe Band te nena nakkum Republic Day-2019 chu kan hman ve ngei theih a beisei thu a sawi chuan mipui a ti lawm hle a ni.

Vawiin khualzahawm Pi.Estheri pawhin thu sawiin, Ram leh hnam himna, dinchhuahna leh hmasawnna hi Education-ah a awm tih hi hre reng turin DIET Siaha Faculty member te leh Trainees te a chah hlawm a ni.

Vawiin DIET building thar hawn tak hi Zopa chhiara chhawng thum a niin, A building pumpui zau zawng hi 846.54sqm a ni. Ground floor hi 292.96sqm a zau niin, Class room(54 capacity) , Computer Lab, Principal Room leh Establishment room a awm a. 1st floor hi 279.20sqm a zua niin, Class room , Resource Centre leh Faculty room te a awm a, 2nd floor hi 274.38sqm a zau niin, he floor-ah hian Class room, Science Lab leh Library te a awm ve thung.

DIET building thar hawnna-ah hian Minister hi a nupui Pi Lalbiaknii bakah School Education a official te leh SCERT a official thahnem takin Aizawl atangin an lo tawiawm a. Siaha atangin Pu N.Zakhai CEM, MADC leh a thawhpui EM leh officer te, Ex Minister leh MDCC President Pu S.Hiato te, Rev.Dr.Lai-u Fachhai, ECM Sr.Executive Secretary te , Head of Office leh sawmbik prominent citizen thahnem takin an tawiawm a ni.

Vawiin DIET Siaha hawnna inkhawm hi Pu H.Lalfakzuala, Principal DIET in lawmthu sawina in a titawp ta a ni.

Minister hian DIET Siaha building a hawn hriatreng nan DIET building kawtah thingtiak a phun nghal bawk a ni.

Attachment