478/2025-2026
Aizawl, the 6th of May, 2025 : Vawiin May ni 6, 2025, Thawhlehni tlai dar 4 khan Pu Lalnghinglova Hmar, Minister of State for Sports & Youth Services Department, etc leh MLA, Aizawl West – II (AC) bialtu chuan a bial chhung aṭanga HSLC Exam 2025 a Top 10 a langte leh MPSC Combined Competitive Examination 2024 a hlawhtlinna changte lawmpuina hun a Office Chamber-ah a hmang.
He hunah hian bialtu MLA chuan HSLC a hlawhtlinna changte chu a lawmpui thu sawiin, "Zirlai nihlai chuan hlawhtlinna ropui tak a ni a, mahse hei hi in bul tanna chauh a ni a. Pen khatin hma in sawn a, a lehpek a la awm a, in kal zelna turah duhsakna ka hlan che u." tiin a fuih.
MPSC Combined Competitive Exam a tling tharte chu an thawhrim rah an seng a, a lawmpui thu a sawi a. "Phaiah te kan kalin All India Services leh Central Services-ah te Mizo han dawr tur an awm thin lo hi rualawh a na duh a, chuvangin a tumna kan nei a nih chuan theihtawp chhuahin bei ila, a tluk a awm lo a ni. Chutihrualin tuna kan service ah pawh rinawm leh dik takin kan hnaah thahnemngai ila, ram tana hnathawk kan ni." tiin a chah.
Lawmpuina hunah hian Aizawl West – II (AC) aṭangin heng mite hnenah hian Pu Lalnghinglova Hmar, MLA chuan lawmpuina thilpek a hlan.
HSLC Top 10-a langte:
7th position:
Arza Lalawmpuii d/o Aldrin Vanlalruata
Dawrpui Vengthar, St Paul’s HSS
9th position:
Steven Lalawmpuia s/o Dr. Lalchhuanawma
Kanan Veng, St. Joseph HSS
MPSC Combined Competitive Exam a tlingte:
1. C. Lalchhandami d/o C. Laldawngliana, Kanan Veng (8th, MCS)
2. Lalhruaizela s/o B. Vanlalvena, Dinthar (15th, MCS)
3. Andrew Laldosanga Ralte Rengci s/o Rengliansawta Ralte Rengci(L), Kanan veng (33rd, MPS)
Pu Lalnghinglova Hmar, Minister of State leh MLA, Aizawl West – II (AC) bialtu chuan HSLC Top 10 a langte hnenah hian lawmpuina thuziak (Memento) leh Laptop a hlan a, MPSC Combined Competitive Exam a tlingte hnenah lawmpuina thuziak (Memento) leh sumfai ₹20,000 ṭheuh a hlan a ni.
