Vawiin khan AH & Vety Minister Pu C. Ngunlianchunga chuan Paithar khuaa Government Kaladan High School building thar Rs. 34.24 lakhs senga sak chu a hawng.

Thu sawiin Minister chuan zirlaite hi kan ram hmalam innghahna lungphum pawimawh tak an ni a, kan thalaite kan chherchhuah that leh that loh hian kan ram naktuk a hril a, hei vang hian an zirna, an zirna In leh an zir dan phung thlengin a tha thei ang bera kan thuam zel a tul tak zet a ni. Hetih lai hian zirlai naupangte pawh an hma lam hun in puahchahna tha ber a ni tih hriain an zirlaiah rilru tak tak pe chung leh taima taka an zir a ngai a ni a ti.

Pu C. Ngunlianchunga chuan Mizoram ah hmasawnna hnathawh tam tak hmuh tur a awm mek a, heng hmasawnna te hian chhungkaw tin fai relbel thleng nghal mai lo mahse ram tan a ni tih hriain lawm nachang kan hriat a pawimawh a ni a ti a, NLUP chungchang sawiin, Minister chuan chhungkaw tin huam tir tumin hmalakna kalpui mek a ni a ti bawk.

Paithar khawtlang ten an tlangdung a tui thianghlim hnianghnar zawka an neih theih nana Kurunglui pump an dilna chu sawifiahin cheng Nuai 520 senna tur DPR siam mek a nih thu leh NEC Additional Priority a dah tura beisei a ni a, nizung chakna hman tum a ni a ti.

Vawiin a hawn tak Government Kaladan High School Building thar RMSA hnuai a sak hi a dung feet 150 a vang Feet 19, Varandah zau zawng feet 6 niin Room 6 a awm a, Mipa leh Hmeichhe inthiarna tur siam a ni bakah tui dah khawlna te dah a ni bawk. Paithar khua hi Lawngtlai atanga chhimlam km 20 vela awm a ni.