Nimin (19.2.2014) khan Minister leh MFA President ni bawk Pu Lal Thanzara chuan Hmuntha khuaa Hualliana Memorial Football Tornament Final khelh hmanpuiin, trophy a sem bawk. He tournament trophy tumtu Chief Engineer (Buildings) Pu. K. Lalsawmvela leh PWD officer thenkhatte leh MFA hruaitu ten Minister hi an tawiawm bawk a ni.

Minister chuan tournament kharna inkhawmah hian thu sawiin, player-te chu thianghlim tak leh infiammi nih tling taka inkhel turin a chah a. Football-ah Mizoramin nasa takin hma kan sawn thu sawiin, Mizo thalai tam tak India club hrang hrangah khelin, eizawnna ngelnghet an neih zel thu te a tarlang a. Heng hi tangtharte taimak vang leh  Sorkarin infiamna lama hmunhma changtlung zawk kan neih theih nana a hmalakna vang a ni, Minister chuan a ti a. Inkhelh hi thil hautak leh hun khawhralna satliah ni lovin, eizawnna tham a nih thu leh, thangtharte pawh Mizoram mai nilo, India a hming chher thei turin taima taka an beih chhoh zel a duhsak thu Minister chuan a sawi bawk.

Minister chuan Hmuntha YMA hnenah ketli(kettle) pakhat leh no engemawzat a hlan a. Hualliana High School-in computer set an dil chu tihhlawhtlinsak tiamin, Hmuntha tlawmngai pawl hrang hrang hnenah Polytarpaulin pek a tiam bawk.

MFA chuan Hmuntha Games & Sports Association hnenah ball pali, goal net pakhat, substitution board pakhat leh Techical Rules Book panga te a hlan bawk. Hualliana Memorial football tournament final-ah hian Hualtu atangin Lalhlimpuii Football Club leh Keitum atangin F. Pianmawia Memorial Football Club te intum in, F. Pianmawia Football Club Keitum an chak a ni.