1192/2022-2023
Aizawl, the 8th July 2022: SIRD&PR Conference Hall, Durtlang-ah LAD Minister Pu K. Lalrinliana hovin LAD officer ten Department chhunga peng hrang hrangte hnathawh hnathawh thlirletna, review meeting hun an hmang.

He hunah hian Minister Pu K. Lalrinliana chuan thu sawiin, 15th Finance Commission Grant kaltlangin Village Council ten khawtlang mamawh hrang hrang te siamin, khawchhung hmasawnna atan tangkai taka hman a ni a, XVFC 2020-2021 atan Rs. 93.00 crore hmuh niin, heng hi VC te account-ah a lut vek tawh a ni a, hna tam zawk thawh zawh tawh a ni bawk a ni a ti a. Kum 2021-2022 Grant atan hian a vaiin Rs. 69.00 crore dah a ni a, Central-in kalphung thar a siam angin, XVFC 2021-22 atang chuan State treasury atanga VC account-ah direct a lut tawh tura tih kan nih avangin, IFMIS kaltlangin Bill siam a ni a, sorkar kum hmasa khan VC account engemaw zatah a lut tawh a, a bak hi kumin FY 2022-2033 chhunga hman theih turin Finance Department-ah revalidation dil mek a ni a ti bawk a ni.

Minister chuan Panchayati Raj system nei ve lo State ten 14th FC Grant kan dawn loh aia pek min pek, Excluded Area Grant hi kum 2018-2019 ah Rs. 45.44 crore leh kum 2019-2020-ah Rs. 16.24 crore dawn a ni a. Heng sum te hi K-Deposit-ah engemaw chen dah a nih hnuah tunhnaiah Rs. 5.00 crore hman phalna pek kan ni a, la release bak te pawh hi hmu thuai thei tura hmalak mek bawk a ni tiin a sawi. Tualchhung inrelbawlna (Rural Local Bodies / Village Council) tichak turin Sawrkar laipui chuan kum 2018-2019 atanga 2021-22 chhung khan Rashtriya Gram Swaraj Abhiyan (RGSA) Scheme thawh khatna a kalpui tan a. Financial Year 2022-2023 atanga 2025-2026 thlenga kalpui turin RGSA Scheme thuam thar leh changtlung zawk a kalpui leh mek a ni. RGSA Scheme chuan tualchhung rawngbawl hna tha taka an thawh theih nan Village Council te thiamna, hriatna leh theihna tih pun a tum tlat a, an hna thawhna kawnga pui turin kawng hrang hrangah te training pek an ni. VC ten inrelbawlna changtlung zawk an neih theih nan VC House thar sak, thawmthat leh VC House-a Common Service Centre dah hna thawh a ni a. Tun thlenga VC house support hmuh dan dinhmun chu - a thar sak tawh zawng zawng zat 10, a hlui repair tawh zawng zawng zat 7 bakah a thar sak mek, sum dinhmun a zirin 140 a tahtawla sak a ni a, a hlui repair lai mek 95 a awm bawk a ni a ti a. Common Service Centre dah tawh zat 10 niin, Common Service Centre dah tura hmalak mek 10 a awm bawk a ni a ti a. RGSA Scheme hnuaiah e-Governance a hma an sawn theih nan VC-te hnenah Computer pek a ni bawk a. Vawiin thlengin VC 193 hnenah Computer set sem tawh niin, VC 50 dang hnena semchhuah turin chah mek a ni a; computer la dawng ve lo VC 591 te pawhin an dawn vat theihnan chak taka hmalak mek a ni, a ti bawk.

Heng bakah hian RGSA hnuaiah SIRD & PR hmunah hian State Panchayat Resource Centre (SPRC) chu District 6 – Champhai, Mamit, Serchhip, Siaha, Kolasib leh Lawngtlaiah District Panchayat Resource Centre (DPRC) neih a nih tawh thu tarlangin; DPRC building neih lohna District- Hnahthial, Khawzawl, Lawngtlai leh Saitualah DPRC Building thar sa turin ruahmanna tluang takin a kal mek bawk a ni a ti.

Minister chuan heng te hi LAD hmalakna pawimawh tak niin District-ah VC-ten Training an neihna tur mai bakah ‘VC Inpui’ zin veivah nikhuaa an thlen theihna tur te, meeting an neih theihna tur te an neih theih nan Sawrkar chuan hma a la a ni a ti a. RGSA Scheme hnuaiah tualchhung ei leh bar tihhmasawnna tur leh Village Council-ten anmahni kutkawiha sum an thawhchhuah, Own Source Revenue (OSR) tihpunna tur Project pawimawh tak tak a kalpui mek a, chungte chu- Bilkhawthlirah ‘Kuhva hnah atanga plate siamna Project’ Rs.49.00 lakh man chu kalpui mek niin, a khawl leh mamawh dangte chah thlen vek tawh a ni a; a building sak mek pawh peih fel tep tawh niin hawn theih thuai beisei a ni a ti a. Sawrkar chuan plastic atanga thil siam hman loh nise tiin hmalakna a nei mek a, chuvangin, kuhva hnah atanga plate siam hi kan chenna leilung tichhe lo tur a nih avangin a tha em em a ni. Thenzawlah ‘Handloom Design Training cum Production Centre’ Project (Rs.141.23 lakh) kalpui tan a ni bawk a; Tuipui Darzokaiah ‘Homestay’ Project (Rs.84.00 lakh) kalpui tura ruahman chu Sawrkar sum remchan veleh thawh tan tum a ni bawk a ni.Heng bakah hian LAD hnuaia Park hrang hrang te tihchangtlunna tur Project te, Leng khuaa Solar Harvesting Project te, Bairabi-ah Tourism lam hawi Project leh Truck Terminal Project te pawh thawh a nih theih nan Central Sawrkarah Proposal- te thehluh a ni tawh tih a sawi a.

Tuna VC Dan kan hman mek, The Lushai District Councils – Act 1956 thlakna tur The Mizoram Village Council Bill, 2022 hi a hmawr bawk chhoh tan tawh niin, tunah hian Law & Judicial Department-ah vet turin a thang mek tih tarlangin. He Act thar hmang hian VC-te thuneihna leh hnathawh dan hrang hranga duhthusam tawk lohna lai awm te a theih ang ang chinfel a nih beisei a ni a ti bawk.

LAD hnuaia Scheme hrang hrang kaltlanga Village Council-te hnathawh leh tanpuina pekchhuah te hi a nodal Department, a bikin VC-te nghenchhan ber DLAO leh LAO-ten, an pawisa dawn te a nihna ang takin, khawtlang mipuite tana chhen fakawm tur an siam ngei em tih te enpuia, a tul angin technical support pek kawngah te, an Cash Book leh account vawn that kawngah pawh enpuia, thawhhona tha tak nei turin Minister hian a chah a. Sawrkarin VC te hmasawnna tura kawng hrang hranga sum leh pai a sen zawng zawngte hi a lo thlawnin a luanral mai lohnan, mipui sum a nih ang ngeiin a hlawkna tak tak chu mipuiin an telin, an chhawr tangkai ngei tur a ni tiin a sawi. Kumtina MoPR in a buatsaih, National Panchayat Award inelnaah VC tam zawk an tel theihnan, record vawn kawngah te, VC hnathawk tha leh a ngaihna hria an rawn chhuah belh zel theihnan VC te chawk phurtu leh fuihtu lo ni zel turin a ngenin a chah thar bawk a ni.

He hun hi LAD Secretary Pu David Lalthantluanga'n kaihruaiin, DLAOs leh LAOs ten PowerPoint Presentation hmangin District tina an hnathawh tawh leh thawh mek bakah hmachhawp te tarlanna hun an hmang a. Chawhnu lamah Business session neiin, XVFC Grants hnuaia administrative cost, RGSA chungchang leh a dangte sawihona hun an hmang a ni.

Attachment

  • Loading attachment...