1193/2022-2023
Aizawl 8th July 2022: India President Inthlan atana inbuatsaihna kal zelah vawiin khan Mizoram Legislative Assembly Committee Room-ah Mizoram Joint Chief Electoral Officer & Acting CEO Pu David L. Pachuau kaihhruaina hnuaiah meeting pawimawh tak neih a ni a. He meeting-ah hian President Inthlan nena inkaihhnawih department aiawh officials te an tel tha hle a, Mizoram Legislative Assembly Commissioner & Secretary leh ARO ni bawk Pu H. Lalrinawma chuan President inthlanna chungchanga hriattur pawimawh thil chi hrang hrangte a sawifiah a ni.

India ram hotulu ber inthlanna tur a nih angin vawiina meeting-ah hian security leh thil pawimawh dangte chipchiar takin sawiho a ni a. India President Inthlan hi July ni 18, 2022 (Thawhtanni) khian Mizoram Legislative Assembly hmunah neih a ni dawn a, officials on duty zawng zawngte leh Vote thlak tur MLA/MP te chu Covid screening neih vek a ni ang. President thlannaa hman tur Ballot Box hi New Delhi atangin thlawhnain rawn phur chhovin, Assembly House-a Strong Room-ah venhimna khauh tak hnuaiah dah nghalin; inthlan ni (polling day) tukah Ballot Box hi New Delhi lamah thlawhthlakpui nghal a ni ang.