Minister pahnih Pu N.K.Chakma  Disaster Management & Rehabilitation leh A.H.&Vety Department Minister  leh Pu S.Hiato, PHE Minister te chuan nimin khan lehlangin Central Training Institute Sesawnga Disaster Management Training nei mek State Disaster Response Force te an tlawh.

Training mekte nena inkhawmna hun tawite buatsaihah thusawiin Disaster Management Minister Pu N.K.Chakma chuan Sik leh Sa inthlak danglam nasat avangin engtiklai pawha chhiatrupna tawk thei reng kan ni a, chuvang chuan hetiang Training neih hi kan tihmakmawh a ni a ti a, Trainee te chu an thil zir hi midangte nunna chhanchhuah hna anih avangin thahnemngai taka rilru pe turin a chah a, kumtin chhiatna chi hrang hrang leimin, thlipui, kangmei leh adangte kan tawk ziah a, hetah hian mumal taka inkaihhruaina a awm thin loh avangin tlawmngai pawlte pawhin duh angin chhanchhuahna an thawk chak thei thin lova, heng harsatna lak atang hian he training hian nasa takin hnathawh a tih awlsam a beisei thu a sawi a ni.

Minister Pu S.Hiato pawhin hetiang practical training buatsaih ani hi lawmawm atih thusawiin chhiatrupna lo thlen hun mai bakah hemi lo hmachhawn tura midangte zirtirna pe leh chhawng tur an nih avangin Training mekte chu theihtawp chhuah turin a fuih a, tlawmngaihna leh hmangaihna nena an hna thawk tur leh nunna hial pawh thap ngai nise midangte chhanchhuahna atana inpe ngam tura inbuatsaih an nih avangin chhuanawm a tih thu  a sawi bawk a, chhanchhuahna hnathawhna atana hmanraw mamawh ang angte pawh ngaihtuah ran tul a tih thu a sawi bawk.

Minister-te hian ahmunah Trainee ten an thil zir damlo bawihsawm dante leh in chim atanga damlo lakchhuah dante ataka an entir (live demonstration) chu an thlir nghal bawk a ni.

He trainingah hian chhanchhuahna hna chi hrang hrang thawh dan tur an zir chikim hle a, vawiin ah khan LAD Picnic Spot Lawibual-ah tuitla chhanchhuah dan an zir leh bawk a ni.

Mizoram hi India rama State Disaster Management Force din hmasa ber a nih mai bakah SDMF te tana Training buatsaih hmasa ber a ni bawk a, Mizoram State Disaster Management Force-ah hian Company 4 awmin 1st Bn MAP, 2nd Bn MAP, 1st IR leh 2nd IR te niin an ni hian District vil tur an insem theuh a, tun trainingah hian mi 50 1st Bn MAP leh 2nd Bn MAP atang mi 25 ve ve an tel a, Training hi 1st Bn National Disaster Management Force Guwahati ami ten an rawn pe a ni. Training hi May 24, 2010 atanga tan niin June 19, 2010 thleng a awh ang.

Minister-te hi Dr. L.B.Sailo A.H.&Vety Director, Pu V.Sapchhunga Disaster Management & Rehabilitation Director leh I&PR Officer ten an tawiawm a ni.