Vawiin chawhnu dar 1:00 PM khan Vanapa Hall ah  North Eastern Zone Cultural Centre(NEZCC), Dimapur leh Art & Culture Department te huaihawtin thawnthu lemchan kutpui hman a ni a. He lemchan kutpui hi Art & Culture Minister Pu PC Zoram Sangliana leh Pu TT Zothansanga, MLA te'n  hman puiin Art & Culture Department Jt Director Pu Ngurbiaka'n a kaihruai. Mizo leh Manipuri thawnthu behchhan a lem chan hmuhnawm tak tak entir te chu mipui kal khawm te chuan an hlut hle.

Lemchan Kut hawngtu Art&Culture Minister chuan mahni hnam ro thil hlut sak chu changkanna anih thu a sawi a. Art & Culture Department pawh in theihtawp chhuahin Mizo Culture ti hmingtha tur leh mite hriat a pho chhuak tur hma a lo lak tawh thu leh tan a lak deuh deuh tur thu a sawi bawk.National School of drama leh NEZCC bakah Sangeet Natak Academy te nen thawhhona tha tak Art & Culture Department chuan a nei mek a ni a ti.Chief Minister Pu Lal Thanhawla leh Art & Culture Departmen hmalakna zarah Vanapa Hall hlui tawh tak cheithat nan DONER in cheng vaibelchhe 25 a dah hran sak tawh thu a sawi a, detailed project report(DPR) peih fel a nih hunah Hall sak hna hi tan a ni ang a ti.Vanapa Hall sak thar tur chu Sound system leh hmanraw changkang zawk nena thuam  a nih tur thu a sawi. Mizo nula leh tlangval 30 rual te chuan April leh May thla ah ni 45 chhungin Drama expert Pu M.Noushad, National School of drama, New Delhi a mi kaihruaina hnuaiah lemchan zirtir an ni anga a. Training chhuak te hian lemchan 'The Caucasian Cirlcle' tih chu September ni 10 khian  Common Wealth Games inpuahchahna programme kal zel atan New Delhi ah an entir dawn a ni a ti.Common Wealth Games a lam tur nula leh tlangval 80 Art & Culture Department thlan chhuah te pawh  hnamdang te mit hmuh ah Mizo nunze mawi lan tir tur leh hawihhawm taka khawsa turin Mizo mipui ten an beisei a ni a ti.

Vawiin lemchan kut pui ah hian lemchan hmuhnawm tak tak Thanglai Lemchang Pawl, Upper Republic te chan  "CHAWNGVUNGI LEH SAWNGKHARA" , Mizoram Drama & Film Organisation, Aizawl chan Mizo nula leh tlangval inkara hmangaihna thawnthu hmasa ber ti a mi thenkhatin an chhal "LIANHNUNA LEH TLANTHANGI" leh The People's Art & Dramatic  Association(PADA), Imphal East, Manipur a mi te chan "MAWAKHORI CHINAI"  te chuan mipui kalkhawm te mit leh beng a fah hle.