1485/2026-2027

Aizawl, 22nd July, 2026: Vawiin khan Mizoram Sawrkar, Health & Family Welfare Department chuan Mamit District Hospital Building inhlanchhawnna programme chu Minister Pi Lalrinpuii Office Chamber, MINECO, Aizawl-ah buatsaih a ni a. He hunah hian Zamzo Engineering Construction & Consultancy neitu Pu Ronnie Zolianngura chuan Mamit Hospital building chu Mizoram sawrkar hnenah Health & Family Welfare Minister Pi Lalrinpuii hriatpuina in a hlan.

Minister Pi Lalrinpuii chuan thu sawiin Ministry hmasa lamah Hospital neihna turin MoA sign a nih thu a sawi a. Power Finance Corporation Ltd. (PFC), New Delhi CSR fund hmanga he project hi kalpui a nih thu sawiin, kum hmasa lamah sum an dawn kim loh avanga Hospital chu sak zawh a nih loh thu leh inhlanchhawn a rem loh thu a sawi a. Minister chuan vawiinah Mamit Hospital IPD Block chu sak zawh tawh niin inhlanchhawnna hun an nei thei chu lawmawm a tih thu a sawi bawk a ni.

He hunah hian Pu Ronnie Zolianngura chuan Mamit hospital an sak dan report tawi a pek zawh hnuin Mamit hospital sak zawh tak chu Mizoram sawrkar hnenah a hlan nghal a ni.

He project hi Power Finance Corporation Ltd. (PFC), New Delhi CSR fund leh Mizoram sawrkar atangin 70:30 a inchawisema kalpui niin he project atan hian cheng vaibelchhe 17.934 sen a ni. Mamit Hospital hi chhawng 5 a sang niin, a zau zawng hi 4,240.78 sqm a ni. MoA chu March 6, 2020 khan sign a ni a, COVID-19 hripui leh lockdown avang te, building design siam danglam ngaihna avang te hian project hunbi chu tlai deuh mah se, hna chu zawh fel tawh niin Completion Certificate pawh May ni-2, 2025 khan pek a ni.

He Project hian hospital-a khum 30 awm tawh aṭangin khum 100 nei IPD Block thar siam a ni. Hei hian Mamit District a mipuite tana quality tha zawka secondary healthcare service pekna te, nu leh nau enkawlna te, emergency service te, operation theatre te, laboratory te, imaging leh medical service hrang hrangte pawh changtlung takin a buatsaihsak a ni. Hospital thar hian district mipuite tana damdawi leh inenkawlna awlsam zawk a siam dawn a, tertiary hospital-ah referral ngaihna a tihniam bawk ang.

He hunah hian Health & Family Welfare Department official te kim takin an tel.