1632/2026-2028

Kawnpui, 3rd August, 2026: Vawiin chawhnu  khan VC-III Complex, Kawnpui-ah Kawnpui Zone Volleyball Championship - 2026 kharna hun (Closing Function) hman a ni a. He hun hi Prof. Lalnilawma, Minister of State (RD&AD, PHED & DM&R Dept.) chuan khuallian niin a hmanpui. He hun hi Pu B. Lalthakima, President, Kawnpui Zone Volleyball Association chuan a kaihruai a ni.

Khuallian Prof. Lalnilawma chuan thu sawiin, he tournament sponsor-tu Tuirial West ZPM Block leh final thlenga thahnemngai taka buaipuitu Kawnpui Zone Volleyball Association te hnenah lawmthu a sawi a. Sawrkar chuan thalaite hmakhua a ngaihtuah hle a, zirna leh infiamna lamah pawh hma sawn zel turin theihtawp a chhuah mek a ni, a ti. Thalaite tana hna lak chungchangah sawrkarin a theih ang tawka hma a lak thu sawiin, "MPSC pawh thuam chak mek a ni a, a pisa (building) tihzauh hna leh thawktu tam zawk lak theihna turin hma lak zel a ni. Nikuma Police lakna a fair zia pawh kan hre theuh ang a, hna lak a fair tawh avangin thalaite pawh tang sauh sauh turin ka duh che u a ni," a ti.

Minister chuan Mizorama ruihhlo lut thin chungchang a vei thu sawiin, ruihhlo dona kawngah sawrkarin theihtawp a chhuah mek zel a ni, a ti a. "Thalaite ruihhlo laka an fihlim theih nan infiamna hi thil pawimawh tak a ni a, chuvangin infiamna lam hi uar zual zel tur leh ruihhlo laka fihlim turin thalaite ka chah a ni," a ti bawk. Tuirial bial chu eptu (opposition) bial ni mah se, sawrkar chuan hmasawnna hna theih tawkin a thawh chhunzawm zel dawn tih a sawi. Hmasawnna hna hrang hrang tarlangin, Community Management Training Centre hawn theih mai tura peih a nih thu leh, RSETI Training Centre pawh Kawnpui-ah a awm dawn thu a sawi a. PWD Highway Division, Thingdawl-ah building thar sak thuai a nih tur thu leh, Thingdawl-ah Nursing College building thar sak thuai a ni dawn a, a sa tu tur (tender) pawh tihfel a nih tawh thu a tarlang bawk. Khawtlang hruaituten thalaite tana hma an lak thinna chu chhunzawm zel turin a fuih a ni.

He hunah hian Commissioned Pastor Laljohnsona, Seventh Day Adventist in hunserh a hmang a. Pu H. Lalfakzuala, President, ZPM Tuirial West Block hnen atangin thusawi tawi ngaihthlak a ni a. Pu H. Lalfakzuala,ZPM Tuirial West Block President chuan lawmthu sawiin, Kawnpui mipuite hman tur Auditorium changtlung tak cheng nuai 400 man hu sakna tur sawrkarin a pawm (approve) chu lawmawm a tih thu a sawi bawk. Hemi bakah hian Pu Clement Lalhriatpuia, President, Kolasib District Volleyball Association (KODVA) hnen atang pawhin thusawi tawi ngaihthlak a ni.

He Volleyball Championship-ah hian Mipa (Open) team 12 leh Hmeichhia team 7 an tel a, Veteran category a awm bawk. Veteran-ah hian Kawnpui Venglai chu champion an ni a, Hmeichhe lamah Thingdawl Kevin Volleyball Club te an champion bawk. Mipa (Open) final hi Hortoki Venglai Sporting Club leh K. Lalnunmawia Memorial, Kawnpui Hmarveng ten an khel a ni.