1548/2026-2027

Dated New Delhi 27th July, 2026: Thawhtanni (27th July 2026) khan Disaster Management & Rehabilitation Minister Prof. Lalnilawma chuan khawvel hmasawn nana thawktu pawl lian tak tak te nen inkawmhona New Delhi Mizoram House ah thawhtanni  khan an nei a. Mizoramin ei leh bar zawnna  ngelnghet, chhuan lo la awm leh zel tur te pawhin an la chhawr theih tur neihdan tur a sawipui.

He inkawmhonaah hian RMI Foundation, ICLEI, United Nations Environment Programme (UNEP) leh United Nations Development Programme (UNDP) aiawhte an tel a, Minister hian Mizoram sawrkar chuan hmasawnna tluantling leh tlo a ngaih pawimawh thu sawiin, chu hmasawnna chu khawvel sik leh sa chhe zel pawh tuar thei, kan chhehvela nungcha te venghim reng chung si a khuarel chhiatna thleng thut thei laka invenhimna ni bawk, state chhunga cheng te zawng zawng rualkhai taka hmasawntirtu ni thei ngei hmasawnna a ngaih pawimawh thu sawiin, Mizoram chu a hmahruaitu nih a, North East state dang te tan pawha entawn theih an nih ngei a beisei thu a sawi bawk a ni.

Minister chuan Mizoram chu theihna nasa tak nei state ni mah ila, kan ram leilungin a zir loh thu sawiin, khawpui thang chak tak te leh sik leh sa danglam zel vanga chhiatna thleng fo thin chuan nasa taka nghawng a neih thu a sawi a. Hmundanga kan tih ang kha Mizoramah chuan a remchan ve vek loh thu sawiin, Mizoram chhungah chuan a hranpa liau liaua hma kan lak a tul thu a sawi a, chu hmalakna chuan hmasawnna tluantling leh tlo chu ngai pawimawh ngei ngei se a duh thu a sawi bawk a ni.

RMI Foundation te nena an sawihonaah chuan Minister chuan Mizoram chhungah kan chhehvela nungcha leh ramngaw tibawlhhlawh a tichhe lo tur zawnga chakna(energy) kan sawk chhuah theih ve a duh thu sawiin, hmasawnna ruhrel nghet tak kan neih ngei a tul thu a sawi bawk a, hmasawnna hmalakna thar reng reng chuan kan chhehvel boruak leh ramngaw te ngai pawimawh tel zel thei se, Mizoram tlang ram leh North East state dang te pawhin an chhawr tangkai theih tur ngaihtuah reng chunga hmasawnna kalpui a tul thu a sawi bawk a, chumi atan a thawhho zel theih a beisei thu a tarlang bawk a ni.

ICLEI hotute nen hian Mizoram chhunga chak taka hmalakna awm apiang te puitlin dan tur sawihona neih a ni bawk a, Mizoram chhungah chuan damdawi lama inenkawlna tha zawk leh mipui te hman tangkai theih tur kawng hrang hrang a hmasawnna dap dan tur sawiho a ni bawk.

UNEP hotute nen pawh inkawmhona neiin, Mizorama boruak thianghlim zawk a awm zel theihna tur te, lo neitute leh ran vulhtuten an thil thar chhuah an vawn thatna tur te, sik leh sa inthlak danglam zel tuar thei thlai thar dan te, ei leh bar hmuh dan tha zawk te leh kan chhehvel a thil awm te hlamchhiah lo a hmasawnna kalpui dan tur an sawi ho a. Ran vulhtute tana sik leh sa vanga harsatna awm thin leh hrileng laka an him zawk theihna tur a insurance pawimawh zia te an sawi bawk a, Mizoram sawrkar chuan chumi kawnga hmalak chu a inhuam thu a sawi bawk a  ni.

UNDP hotute nena an inkawmhonaah chuan khuarel chhiatna a lo thlen thut a Mizoram chhung a hmanrua leh thawktu lama  intihchak dan tur an sawiho a, hmalak theihna thenkhat Detailed Project Report ( DPR ) mumal tak siam te, chhiatna thlen theihna hmun uluk taka zir te, district level-ah pawh a theih ang ang a hmalak a district thuam chak te, hmanraw lama inthuam chak a tul thu te sawi a ni a, chhiatna lo thlen tawh hnu a hmalak zel dan tur awm thei kawng hrang hrang te sawiho nghal bawk niin, Minister hian khuarel chhiatna thleng thei laka inveng tur chuan thiamna nasa tak a ngaih thu sawiin, UNDP a mithiamte chu Mizoram dinhmun uluk zawk a zirchian pui turin a sawm bawk a ni.

Minister chuan Mizoram sawrkar chu hmasawnna tha leh awmze nei zawka thawk tur a an inpeih reng thu sawiin, Mizoram ang tlang ramah pawh hmasawnna tluantling leh tlo a neih ve theih tih kan tarlang thei a ni a ti bawk. Hmasawnna thawktu pawl hotute pawhin Mizoramin a hmasawnna tluantling leh tlo neih an duhna chu puitlin a nih ngei theih nana thawhho ngei an duhthu an sawi bawk a  ni.

Minister hi Pu Alexander V. Chongthu MCS, Additional Resident Commissioner of Mizoram House, New Delhi chuan a tawiawm a ni.