1818/2023-2024

LUNGLEI; the 9th September,2023 : Vawiin chawhnu khan Rahsiveng Indoor Stadium-ah Sub.Hqrs YMA Lunglei Golden  Jubilee lawmna puala  buatsaih TATA SK 712 Inter Branch YMA Badminton  Tournament-2023 closing function chu Agriculture Minister chuan khuallian niin a hman pui.

He hunah hian thu sawiin khuallian chuan Sub Hqrs YMA Lungleiin kan thalai te hmakhua ngaia kawng hrang hrang hmalakna a nei thin chu lawmawm a tih thu sawiin, Badminton bakah Sports discipline hrang hrangah pawh hetianga thalai te tana inelna thianghlim leh veng hmel pholang theih tur inelna hi an buatsaih zel theih nan duhsakna a hlan a. Khuallian chuan Games and Sports inelna bakah Ram leh Hnam humhalhna kawnga Essay inziahsiakna te pawh SYMA hian   huaihawt thei se, ti a duhthu a sawichhuak bawk.Minister chuan hetianga  inelna hian Branch hrang  hrang inkarah inpawhna tha zawk leh inhmelhriatna  tha zawk a hrinchhuah bakah hmalam hun atan thawhhona tha zawk a hrinchhuah ngei a beisei thu  sawiin, he tournament  buatsaih chhan hre renga Badminton player te pawhin sportsman spirit nen inelna hi hmachhawn tur leh chak ngei tura   theitawp chhuaa khel theuh turin a fuih hlawm a ni.Minister in Golden Jubilee  lawmna cake a zai zawhah Pu Zothanzuala Hnamte, Secretary,SYMA Lunglei in vote of thanks sawiin Badminton Tournament  inelna Final lut Luangmual leh Rahsiveng  Branch YMA  ten Final Match an khel tan nghal a ni.

Final Match-ah hian Mipa Category-ah Men's Doubles team 4 Man's Single team 1 , a vaiin team 5 te an inel a, best of five winner chu Branch  champion a puan an ni a. Hmeichhia Category-ah Women's Doubles team 1 in Branch ai an awh thung.

Luangmual Branch YMA chu Mipa Category-ah champion in; Hmeichhe Category-ah Rahsi veng te an champion ve leh a ni. Tichuan a pumpuiah  Lungmual Branch YMA chu TATA SK 712 Inter Branch YMA Badminton Tournament -2023  a Branch champion a puan an ni ta a ni. Khuallian Pu C.Lalrinsanga'n lawmman semna  hun a hmang nghal a. Mipa champion team ten Trophy leh Rs.20,000 an dawng a.1st Runner Up ten Trophy leh Rs.10,000 an dawng bawk.

Hmeichhe Doubles a champion ten Trophy leh Rs.3000 dawngin, 1st Runner  ten Trophy leh Rs.2000 an dawng thung a ni.

Closing function inkhawm tawi hi Pu Francis Lalnuntluanga Ralte, Vice Chairman Sports Committee SYMA,Lunglei in a kaihruaiin, Pu KT.Nghawra, Sr.Vice President,LDBA in thusawina hun a hmang bawk.