1082/2022-2023
Aizawl the 29th June, 2022 : Vawiin khan Mizoram Milk Producers' Cooperation Union Limited (MULCO) Annual General Meeting vawi 26-na chu Bawngkawn South YMA Cultural Centre-ah neih a ni a, Cooperation Minister Pu C.Lalrinsanga chu khuallian a ni a, he hun hi a hmanpui a ni.

Minister Pu C. Lalrinsanga chuan MULCO din tirh atangin thawhhona leh inzarzawmna, loneitu te leh sawrkar inkarah a awm a, hmasawnna tam tak MULCO hian chang tawhin covid-19 a lo thlen chhungah erawh ran vulhtuten bawnghnute an tharchhuah atanga sum an hmuh thin te kum dang a phak loh chungchangah leh ranvulh population pawhin a tuar hle chu pawi a tih thu leh a tuarpui tak zet thu a sawi a. Minister chuan bawngvulh hi eizawnna tlaka siam kan tumna kawngah ramin hmasawnna tur tam tak a la nei a, chungte chu bawhzui turin theihtawp chhuah a ni zel a ni a ti a. Bawnghnute atanga siamchhuah hrang hrang pawh kan ngah ve ta hle a, hengte hi ram dinhmun chawisan theihna a ni a, eizawnna tlak niin chhungkua tam zawkin tangkaipui se, bawnghnute leh thildang siamchhuahte hi kan rilru taksa than nan chaw tha tak a ni tih hre reng chungin, hmasawnna rahbi kawng zawh zel turin kalkhawm zawng zawngte duhsakna a hlan a ni.

He hun hi MULCO Chairman Pu Vanlalchhunga'n a kaihruai a, BOD member Pu J.Lalngaihawma'n chawhma hun hi lawmthu sawiin a khar a. Chawhnu lamah hian business session neih a ni.

Kum kalta 2020 - 21 chhung khan MULCO in hma a sawn theih nan theih tawp a hma lak a ni a, member zawng zawng ten an bawnghnute neih ang ang tam zawk MULCO a an chhun theih nan te, bawnghnute tha leh thianghlim ngei an chhun theih nan te, heng bawnghnute te hi thianghlim taka sawngbawl a, mipui hnenah tha taka zawrhchhuah
a nih theih nan te hma lak ani.

Mizoram Milk Producers' Cooperative Union Limited (MULCO) hi A.H & Vety Department hmalaknain ni 5.1.1983 khan din a ni a, hemi hnu ni 5.6.1984 khan Mizoram Cooperative Act hnuaiah register a ni a, a registration no chu A-31/83-84 of 5.6.1984 a ni. MULCO hi Cooperative Act hnuaiah mahni a ro inrel (Autonomous body) niin Mizoram pum huap tura duan a ni a, MULCO hian khaw hrang hrang leh Veng hrang hranga Primary Society te a khaikhawm a ni. A din atanga engemaw chen A.H & Vety Department hnuaia a awm hnuah ni 21.3.1995 atang khan A.H & Vety Department atanga indangin amahin a ding hrang ve ta a ni.

Tun dinhmunah hian MULCO hnuaiah hian affiliated Society 53 an awm mek a, heng societyah hian member 742 an awm a, heng zinga mi 195 te hian MULCO ah bawnghnute an chhung mek ani. MULCO hnuaia member te bawng vulh zat chu a vaiin 480 a ni.

Milk Union in a thil tum ber chu bawngvulhtute huikhawm leh society dinpui a, a hnuaia Society hrang hrang te bawnghnute leisak a, sawngbawl thianghlim hnuah mipuite hnena zawrhchhuah bakah Society member ten tha taka bawng an vulh theihna tur leh hma an sawn theihna tura an mamawh hrang hrangte ngaihtuahsak leh a tul anga zirtirna pek te a ni.

Attachment

  • Loading attachment...