Nimin atang khan Pu John Rotluangliana, Minister, FCS&CA, Tourism, Transport chuan a bial chhung khaw hrang hrang Tuirum, Khawhnai leh Hruaitluang khuate a tlawh a. Khawtlang hruaitute'n an khaw chhung mamawh hrang hrangte Minister hnenah an lo thlen.

Heng khaw hrang hrang a tlawhnaah hian khawtinah khawtlang hruaitute nen inkawmhona an nei a. Khawtlang mamawh leh tul chi hrang hrang, inkalpawhna kawngpui chungchangah te, health sub-centre chungchangah te, tui thianghlim in tur chungchangah te, zirna kawngah leh khawtlang mamawh thil hrang hrang Community Hall leh Retaining wall thawmthat chungchangte Minister hnenah hian lo thlenin Minister pawhin hmalak nghal theihte chu hmalaksak nghalin tih nghal theih loh pawh a rang lama an ngaihtuah dawn thu a sawi a ni.

Minister hian Hruaitluang khaw chawm turin National Rural Drinking Water Programme (NRDWP) hnuaiah Cheng Nuai 70 sengin PHE tui pump -na project ruahman mek a nih thu leh Mizoram Godown tinah Monsoon Stock an dah vek tawh thu a sawi a. NEDP hnuaiah Dampa Tiger Reserve tlawhtu Tourist te tan heng khaw 6 Hruaitluang, Damparengpui, Dampa Zodin, Tuipuibari, Rajivnagar I leh Rajivnagar II - ah te chhungkaw 35 tan homestay Tourism ruahman mek a nih thu sawiin Transport Department hnuaiah Two Wheeler Taxi chu Aizawl khawpuiah tlantir mek niin India ram pumah Goa leh Aizawlah chiah Two Wheeler Taxi service kan nei a ni a ti.

Pi Lalbiaksangi, Mamit District Bawrhsap pawhin Mamit District chu ziak leh chhiar thiamna kawnga nasa taka an thawh mek thu sawiin tunah hian ziak leh chhiar thiamtirtu (Animators) bakah ziak leh chhiar thiam tharte'n Rs 300/- an dawn zel theih thu a sawi a. Hriselna kawnga hmasawn zel tura chahin April Ni 16 - a launch tur Measles Rubbella Vaccination Campaign chu ngaipawimawh a, Vaccine la vek tur leh VC te pawhin lo tawiawm tha turin a ngen a ni.

Vawiin lam hian Minister hian Damparengpui khua leh Tuipuibari Venghlui Road, BADP hnuaia kawngsial hna thawh mek chu a tlawh leh ang.

Minister hi Pi Lalbiaksangi, District Bawrhsap bakah Mamit leh W.Phaileng khua atangin officials thahnem takin an tawiawm a ni.