Tukin khan Pu John Rotluangliana, Minister, FCS&CA, Tourism, Transport chuan Tuipuibari Supply Godown Buhfai dinhmun, PHC leh PHC Staff Quarters sak mek chu a hmunah tlawhin a enfiah.

Tun dinhmunah Tuipuibari Supply Godown-ah hian Tuipuibari leh a chhehvel khua, Tuipuibari Godown-in a chawmte tan Monsoon Stock Buhfai Quintal 8900 November thla thleng daih tur khawlkhawm tawh a ni a. Godown-ah hian Fur chhunga mipui ei tur Buhfai dah len a nih loh avangin Tuipuibari Community Hall-ah Stock then a ni. Pu P.C Lawmkima, DCSO Mamit leh a hmuna Supply Inspector/Storekeeper te'n Minister hi an tawiawm a. Tun dinhmunah Tuipuibari-ah chuan Buhfai Monsoon chhung daih tur an khawlkhawm tawh thu sawiin eng emaw harsatna thlen thulhah pawh phurh luh nghal vat a nih dawn thu Minister hi an lo hrilh a ni.

Minister chuan Tuipuibari mipuite hman turin Public Health Centre (PHC) chu a rang thei ang bera hawn thuai a duh thu a sawi a. Kumin inthlan hma ngeia a function theih nan a bialtu Medical Officer, Dr.C.Hmingthansanga chu Minimum Staff Requirement thehlut turin Minister hian a hrilh a. Tuipuibari PHC Building hi sak zawh tawh niin Staff Quarters 3 peihfel a ni tawh bawk a ni. Heng bakah hian VC te ram pek Tuipuibari Medical Officer Quarter sakna tur tukin vek khan a hmunah kalin enfiah a ni bawk.

Nimin khan Tuipuibari mipuite nen Public Meeting neih tawh niin Tuipuibari High School enkawl nan MLA Fund Cheng Nuai 1 leh Tuipuibari Venghlui School sak that nan MLA Fund Cheng Nuai 1 a pe a ni. Nimin vek khan Damparengpui khuaah  Damparengpui mipuite nen Public Meeting neih a ni bawk.

Tuipuibari leh Tuipuibari Venghlui, Border Area Development Programme (BADP) hnuaia laih, Motora inkalpawh theihna kawng Cheng Nuai 15 senna chu a hmunah tlawhin duhkhawp lohna lai awmte siam that a nih theih dan tur ngaihtuah a nih tur thu Minister hian a sawi bawk a ni.

Minister hi khawtlang hruaitute'n lo dawngsawngin an tawiawm tha hle a ni.