Nimin chawhnu khan Lunglei CMO Dr Thani Pachuau hovin a Office Chamber-ah Lunglei MJA member-te hnena Measles-Rubella Campaign neih tur hrilhfiahna District Media Sensitization for Measles Rubella Vaccination Campaign hun hman a ni. He hunah hian District SMO leh District Immunization Officer ni bawk Dr Lalrinthangi, District IPRO Pi C.Lalremruati, School Education Department leh Social Welfare Department aiawhte leh Lunglei District MJA member-te an tel.

Lunglei CMO Dr Thani Pachuau chuan Sentut leh Rubella natna chungchang leh hri danna pek kawnga ruahmanna an siam tawh leh hma an lak dan tur a sawifiah a. Tun dinhmunah Lunglei District-ah hian hri danna la thei tur thla 9 leh kum 15 inkar naupang 40,873 awma chhut niin  naupang chiu-na hmun tur 732 ruamhan fel tawh thu a tarlang a. He beihpuithlak a hnathawk tur Vaccinator mi 178, ASHA leh Anganwadi Worker mi 482 leh Supervisor mi 124 leh school tina zirtirtu thlanchhuahte mumal taka training pek an nih tawh thu a tarlang a. He beihpuithlak chungchang mipuite ziritirna kawngah media mite an pawimawh takzet a ni tiin MR Vaccination Campaign hlawhtlinna turin media mi kalkhawmte chu thawhho puiah a sawm. Dr Thani Pachuau chuan MR Vaccine Campaign a target zaa za (100%) pe ngei tura an hmalakna hrang hrang media mite a hrilh bawk.

Lunglei District-a Measles Rubbella Vaccination Campaign Programme hawnna hi April ni 16 zing dar 9:00 ah Southern Flower School-a neih tur a ni a. Hemi ni vek hian School Education Department buatsaihin MR Vaccine Campaign pualin School Rally neih a ni bawk ang.

MR Vaccine Campaign hi hapta nga (5) chhung kalpui tur niin school hrang hrang, Anganwadi, Sub Centre leh damdawiin ah te vaccine hi pek an ni ang. He beihpuithlak tan atanga kar hnih chhung hi school hrang hrang kal chilhin school naupangte vaccination pek an ni ang a. Hemi hnu a kar hnih dang chu Anganwadi, Sub Centre leh hmun remchang dangah pek a ni leh ang. Chawlhkar nga na ah target phak lo dan a zirin Sweeping Phase nei turin ruahmanna siam a ni bawk.

Sentut leh Rubella Vaccine chu a him tawk thu tarlangin India ram state 15-ah he MR beihpui hi thlak tawh a ni a, naupang vaibelchhe 8 MR Vaccine pek tawh niin MR Vaccine lak avanga insawisel, Damdawiin panpui engmah report a awmloh thu Health Department hotute hian an tarlang bawk. Measles leh Rubella natna te hi nunna atana hlauhawm an nih avangin naupang thla 9 leh kum 15 inkar tawh phawt lak tir vek turin Health Department chuan Lunglei District mipuite a ngen a ni.