566/2022-2023

Aizawl, 20th May, 2022 : Supply Minister Pu K. Lalrinliana chuan vawiin chawhnu dar 3:00 khan NABARD Warehousing Scheme (NWS) 2013-2014 kaltlanga cheng nuai 183.9336 senga sak Khawhai Supply Godown leh staff quarters a hawng. 

Hawnna inkhawm Supply Kudam tuala neihah thusawiin Minister Pu K. Lalrinliana chuan Khawhai Supply Kudam sak hi a ngaih pawimawh thu sawiin tun tum hi vawithum a tlawhna a ni tih a sawi a, khawtlang hruaitute pawhin an phurpui a, lungrual takin hma kan la ho thin hi a lawmawm a ni a ti a, a sak hna pawh tha thawkhat hle a a hriat thu leh lawmawm a tih thu a sawi a ni. 

Pu K. Lalrinliana chuan Minister ni a Supply Department a enkawl tirhin Mizoram pumah Supply Kudam 65 sak that ngai a awm thu report a dawng tih sawiin kawng hrang hrangin hma an la tih a sawi a, Chief Minister Pu Zoramthanga pawhin ngaih pawimawh sakin amah ngeiin Delhi ah te pawh a thlen sak a, reiloteah kudam 10 sak phalna hmuin kan sa zo tawh a, a thawhhnihnaah kudam 21 sakna tur kan hmu leh a, hengte pawh hi kan sa zo vek titih tawh a, kan hawng mek zel bawk a, a tul angin hma kan la chhunzawm zel dawn a ni, a ti. 

Minister chuan tun kum hnih chhungin harsatna chi hrang hrang COVID-19 hripui, Assam ramri buai, Myanmar rambuai vanga raltlan kan tawng a, kumtin khuarel chhiatna kan tawng bawk a, mihring mit atanga thlir chuan a manganthlak thin a ni a ti a. Department a thawkten theihtawp an chhuah bakah Zoram mipuiten min tawngtaipui bawk a, heng vang hian Pathianin min tanpui a, heng hun harsa tak karah hian tumah riltam vanga harsatna lian tham tawk kan awm lo a ni, a ti bawk. 

Khawhai Supply Kudam chu mipuite ta a ni tih sawiin Minister chuan khawtlangin enkawlpuia, dimdawi tak leh tangkai taka chhawr tura duhsakna hlanin DCSO leh Storekeeper te nen inlungrual taka thawkho zel turin a chah bawk a ni. 

Khawhai Supply Godown hi a dung feet 50, a vang feet 33, a san zawng feet 23 a ni a. Kudam chhuatah hian boulder phah chhuak vekin a chungah rcc slab an chhung leh a ni. Hnawng leh tui huhin buhfai a tihchhiat loh nan kudam bangah hian brick feet 1 a chhah rem a ni a, uluk taka plaster a ni bawk. 

Staff quarters hi chhawng hniha sak niin a pahnih hi a dung feet 26, a vang feet 23 ve ve an ni a. A chung zawk hi chowkidar quarters tura ruahman niin, a hnuai zawk hi storekeeper quarters tura ruahman a ni. 

Heng bakah hian kudam dawrtute tan inthiarna siam a ni a, tuihawk luankawr tha tak siam ni bawkin, kudam tualzawl hi cement hmanga plaster chhuah vek a ni bawk.

Kudam leh Staff quarters etc. sak hna hi Babie Construction & Consultancy Services (BCCS), Khatla, Aizawl ten an thawk a, November ni 20, 2020 khan sa tanin February ni 25, 2022 khan an sa zo a ni. 

Khawhai Supply Centre hnuaiah hian Ration Card 1219 awmin mihring 5485 in an awm a. Ration Card hrang hrang dinhmun chu hetiang hi a ni :
AAY             - 165 (mihring 415) 
PHH            - 740 (mihring 3585) 
Non NFSA  - 314 (mihring 1485) 

Khawhai Supply Centre hian thla tin buhfai quintal 356.51 (AAY - 57.75 qtls, PHH - 180.20 qtls, Non NFSA - 118.56 qtls) a mamawh a, PMGKAY hnuaiah thla tin buhfai quintal 200.75 (AAY - 20.55 qtls, PHH - 180.20 qtls) a mamawh bawk a ni. 

Khawhai Supply Centre hnuaiah hian buhfai pek chhuahna Fair Price Shop 9 awmin Khawhaiah Fair Price Shop pali a awm a, Chalrang, New Chalrang, Lungtan, Riangtlei leh Vangtlangah Fair Price Shop pakhat theuh a awm bawk a ni. 

Vawiin programme hi Pu K. Lalrohlua, Joint Secretary, FCS&CA in a kaihruai a,  building leh kudam satu Babie Construction & Consultancy Services (BCCS) ten technical report an pek hnuah Pu K. Zorammuana, Under Secretary, FCS&CA hnenah an hlan chhawng nghal a, Pu CC Sakhawliana, DCSO, Champhai in lawmthu sawina hun hmangin hnu a khar a ni. 

Attachment

  • Loading attachment...