567/2022-2023
Aizawl the20th May, 2022 : Vawiin khan School Education Minister Pu Lalchhandama Ralte chuan Govt Mizo High School-ah Day of Govemiknights a hmanpui a, kum thum chhunga he school atanga HSLC-a pass thate chawimawina hun a hmanpui.

Pu Lalchhandama Ralte Minister chuan he hunah hian thu sawiin kum 2020 atangin Covid-19 hripuiin min tibuai a, khawvel pum kan buai a, he kum thum kalta chhung hian Mizoram zirna chu a theih ang angin sorkarin a kalpui a, class pangngai nei lovin online class te kalpui a ni a ti a. Kan zirlaite hi regular class kal nan thla hnih vel chauh hun nei an ni a, an khawngaihthlak hle. Kumin HSLC result a lo chhuak a, hlawhtling tam tak an awm rualin hlawhtling zo ta lo zaa 28 an awm a, heng vanduai tate hian an hlawhchhamna hi tumruhnaah hmang se, hlawhchhamna phenah hlawhtlinna a awm tih hria se a duh thu a sawi.

Pu Lalchhandama Ralte chuan hri avanga harsatna a awm chhung hian India ramah Mizoram chu kum 3 chhunga offline mode-a exam thei awm chhun a ni a, hei hi tanrualna leh thuawihna avang a ni a ti. Minister chuan Mizoramah zirna quality education a awm theihna turin sorkarin theihtawp a chhuah a ni a ti. Mizoramin syllabus a hman chu CBSE te nen a in ang vek a, zirtirtute pawh national norms-ah qualified an tih chin vek, trained chhuak vek an ni a ti a. Hetiang anih avang hian All India level-a inelnaah pawh Mizo nula tlangvalte chu a langsarah an tel thei tih thinlung pu turin a sawm a. Reiloteah sorkar hnaa a fawng chelhtu official-ah hnamdang hlir an awm chuan ram leh hnam tan a pawi dawn a ti a. UPSC leh hna sang exam dangte pawh Mizo thluak hian a phak a ni tih hria a, zirlaite chu ngaihtuahna hmang turin a sawm a, state sorkar pawhin thalai exam duh te tan remchanna a siamsak mek a ni a ti bawk. Minister chuan zirlaiten heng hna sang exam an tlin theihna atan hian All India standard-ah Mizoram zirna a hniam bik lova, syllabus te pawh a hniam bik lova, kan thluak hian India hnamdangte a pha a ni a ti bawk.

Minister chuan zirna leh nationalism-ah harh thar turin zirlaite a sawm a. NEP 2020-in mahni hnam ze mila zirna kalpui a phal angin class VI-VIII zirlaiah Zo nun tih chu Additional subject-ah siam a ni a, hei hi zirlaiten mahni hnam an hriat chian a, an zahpui lohna turin buatsaih a ni a ti a. Pathianin ram leh hnam min pek hi kan chhuang tur a ni a, kan chawimawi tur a ni a ti bawk.

Vawiin a Govt Mizo High School tual zawla Day of Govemiknights hmannaah hian Kum 1972-a zir chhuak te chu khualzahawm an ni a, an zingah hian Mizoram sorkara hna pawimawh tak tak lo chelh tawhte an awm a ni. Kum 1997 zirlaiten an kaihruai a, Mizo High School-a thawk zirtirtute leh zirlai rualte an tel a, zaithiam an zai bakah khualzahawmten thu an sawi bawk.