Pu K. Lalrinliana, Minister of State for Food, Civil Supplies & Consumer Affairs, Local Administration Department leh Fisheries Department chuan tukin khan Ngopa leh N.E. Khawdungsei a a department enkawl hmalakna hrang hrang a tlawh a, Minister hi bialtu MLA Pu L. Thangmawia, Human Resources Development Board Vice-Chairman leh official pawimawh ten an tawiawm a ni.

Minister hian Ngopa a Supply kudam a tlawh hmasa ber a, buhfai dinhmun te leh thilpawimawh bawhzui ngai tur chi hrang hrang te a enfiah a ni. Ngopa Supply kudam hi kum 2014 a sak niin buhfai quintal 2000 leng a ni a, buhfai dinhmun pawh a that thu a thawktuten an sawi a, staff quarters te pawh Minister hian a tlawh nghal bawk a ni.

Ngopa Supply kudam a tlawh zawh hian Minister hian Ngopa khaw dai, Ngopa hmar lam kilometre 2 vel a hla a park siam lai mek a tlawh nghal a, he park zau zawng hi tin li hmun a ni a, tunah hian BDO leh Village Council te tangkawp hmalakna in Swimming Pool leh inthiarna, inbualna leh waiting shed te sak a ni tawh a, he park hi LAD hmalakna a tihchangtlun belh dan tur leh Department kutthlak theih tur awm chi hrang hrang te a hmunah hian sawiho a ni.

Hemi hnu hian N.E. Khawdungsei panin Minister chuan N.E. Khawdungsei a supply kudam a tlawh leh a, he kudam hi kum 2016 a sak niin buhfai quintal 1500 leng a ni a, buhfai dinhmun a that thu leh buhfai supply dawn kawngah harsatna an tawh loh thu a thawktute hian an sawi a, staff quarters te pawh tlawh nghalin Minister hian an harsatna leh mamawhte a ngaihthlak sak a ni.

Pu K. Lalrinliana chuan supply kudam hrang hrang leh Ngopa park a tlawhna ah hian department in a tih tur leh hma a lakna tur te ngaihtuah zui a nih tur thu a sawi a, department tan leh mipuite tana tha ber tur zel ngaihtuah a nih tur thu leh a theih ang ang a hmalak chhunzawm a nih tur thu a sawi a ni.