2276/2026-2027

Aizawl the 18th September, 2026: Vawiin khan Mizoram University chuan International Day 2026 pualin MZU Auditorium ah programme a buatsaih a. Home Minister Pu K. Sapdanga chuan he hunah hian khuallian niin a hmanpui. Pu N. Munish Singh, Zonal Director (Northeast), ICCR Guwahati chu khualzakawm a ni bawk.

Minister Pu K. Sapdanga chuan ramdang zirlai te chu lo lawmin, University chu hnam hrang hrang te an inkawmna leh hnam ziarang hrang hrang an inzir tawn theihna "tukverh" pawimawh tak a ni a ti a. Zirlai te chu mahni hnam tih dan phung leh zia rangte theuh vawng tlat chungin, ram dang hnam dangte tih dan phung te pawh hriatpui a pawm thiam tura inzir pawimawh a tih thu Minister chuan a sawi. Minister chuan hnam hrang hrang kara inbiakpawhna leh inhriatthiam tawnna tha a awm theih nana hma an lak avangin Mizoram University leh ICCR te chu a chhuanawm a tih a sawi bawk.

Home Minister chuan ramdang zirlai ten Inner Line Permit (ILP) leh Visa chungchanga harsatna an tawh te chu thuneitu ten an lo ngaihtuahsak thu sawiin, Mizorama an cham chhungin rilru muang leh hriatreng tlaka hun an hman zui zel a beisei thu a sawi bawk.

Inkhawm hi Prof. H.K. Laldinpuii Fente, Director, Office of International Affairs-in thuhma sawiin a hawn hnuah, Mizoram University Vice Chancellor Prof. Dibakar Chandra Deka chuan kalkhawm te leh ram hrang hrang atanga zirlai lo kal te lawmna chibai bukin thu a sawi a ni.

He huna chawimawina hlan Pu Lalduhthlana, IFS (Retd.), Pu Lalthlamuana, IFS (Retd.) leh Pu G. Vanlalsawma, FRRO te pawhin thu an sawi bawk.

Vawiin programme-ah hian zirlaite atangin hnam lam hrang hrang entir a ni a. Department of Mizo, MZU Herhse Cultural Club ten lemchan “Mizo Lal Zakapa” an entir a, Pachhunga University College (PUC) Chhawkhlei Cultural Club ten hnam lam entirin, international student ten incheina chi hrang hrang entirna (costume parade) an nei bawk. Dr. Albert N. Khizo, Registrar, MZU chuan lawmthu sawiin hun a khar a ni.