1381/2022-2023
Kolasib dated 27th July 2022: Vawiin khan Parish Hall, Kolasibah Sawrkar laipui ruahmanna a India ram pum district 773 a han tur ‘Ujjwal Bharat, Ujjwal Bhavishya, Power @ 2047’ lawmna hun, DC Office, Kolasib, Power & Electricity, Kolasib Division leh NEEPCO tangkawp buatsaihin hman a ni a. Pu K.Lalrinliana, Minister of State, Food, Civil Supplies & Consumer Affairs Department, Kolasib Assembly Constituency bialtu MLA chuan khaullian niin a hmanpui.

Khuallian Pu K.Lalrinliana chuan kawlphetha hnianghnar zawk a hman tur siam chhuahna kawngah India ram pum anga hmasawnna tam tak hmuh tur a awm rualin Mizoram pawhin hmasawnna hmel thar a hmuh ve zel thu a sawi a. Kolasib district chhunga Serlui B Hydel Project leh NEEPCO hnuai a Tuirial Hydel project atanga siam chhuah kawlphethate chu tangkai tak a hman mek a nih thu a sawi. Kolasib district chhungah Sawrkar hnuai a ‘Saubhaghya Scheme’ kaltlangin a thlawn a mahni in a kawlphetha thlunzawm sak chhungkua 1,839 an awm thu te, Pangbalkawn leh Chhimluangah ni zung chakna hmangin tui lak (Solar Water Pump) a nih thu leh Meidumah pawh chutiang hmang thei tur chuan hma lak mek a nih thu a sawi a. Kawlphetha inpek chhawnna changtlung zawk a awm theih nan hmun hrang hrangah Transformer tharte ruahman a nih thu leh ramri hrul a Police duty-na hmun te pawh chhit en a nih tawh thu a sawi. Hmasawnna hna hrang hrang hmahruaitu zinga pawimawh tak chu kawphetha a nih thu sawiin hnianghnar zawk a siam chhuah a nih theih nan leilung hausakna tichereu lo zawng a hmalak leh ni zung chakna hman tam a pawimawh thu Minister chuan a sawi. Kawlphetha hmangtute chu ‘Consumer’ an nih angin an chanvo humhalhna tur dan tha tak tak a awm thu a sawi a, Electric Connection thar dilna kawngah te, Electric Bill pekna kawngahte, kawlphetha chungchanga P&E Department leh mipui indawrtawnna awlsam zawk a awm theih nan te Sawrkarin hma a lak reng thu a sawi bawk a ni.

Pu Lalzarliana, Executive Engineer, P&E Kolasib Division chuan Kolasib district chhunga kawlphetha hnianghnar zawk a awm theih nana hmalakna hrang hrang tarlanna hun hmangin Solar Rooftop Phase-II kalpui mek chu dilna hawn mek a nih thu leh kawlphetha renchemna kawng a hmanraw tangkai tak tur a nih avangin mipuite ngai pawimawh turin a chah a. Mizoram hmun thenkhat ah Electric Pre-Paid meter vuah hna kalpui mek a nih thu leh Kolasibah pawh hun rei loteah kalpui thuai beisei a nih thu a sawi.

Vawiin ‘Ujjwal Bharat, Ujjwal Bhavishya, Power @ 2047’ hmanna hun hi Pu John LT Sanga, Deputy Commissioner-in kaihruaiin ‘Universal Household Electrification’, ‘Village Electrification’, ‘Distribution System Strengthening- Schemes’ leh ‘Capacity Addition’ chungchanga hriattur pawimawh Power Point Presentation a entir a ni a. Kolasib District chhunga Department hrang hrang hotute leh NGO hruaitute he hunah hian an tel a ni.