1502/2023-2024

Kolasib dated 15th August 2023: Vawiin chawhma khan Kolasib Sports Stadium, Project veng, Kolasibah Independence Day lawmna hun hman niin FCS & CA Minister Pu K.Lalrinliana, Kolasib Assembly Constituency bialtu MLA chu khuallian a ni a. Kolasib khaw chhung a Office hrang hrang hotute, tlawmngai pawl hruaitute leh mipui thahnem tak an tel a, Parade Contingent 19 an in lan bawk a ni. Khuallian Pu K.Lalrinliana chuan Independence Day lawmna hun chu ram leh hnam zalen nana nunna hlan te, harsatna hrang hrang tuar huam a ram tan a mi inpe tak tak te tan zahna lan tirna hun pawimawh a nih thu sawiin India khua leh tui kan nih angin ram hmangaihna thinlung pu tur a intuaitharna hun tha a nih thu a sawi a.

Awhbehna lak a zalenna nei tur a hrehawmna leh tuarna nasa tak paltlang ngaite chu theihnghilh mai lovin thangtharte hnen ah Zalenna hlut zia hrilhhretu ni zel turin kalkhawmte a chah bawk a ni. Minister chuan Kolasib district chhunga Sawrkar kaltlang a hmasawnna hna kalpui hrang hrangte tarlangin chhungkaw singruk hnen ah Sawrkar Flagship Programme SEDP hmangin First phase-ah tanpuina pek an nih thu te, Sihhmui ah Oil Depot bun tur a hmalakna a kal mek thu te leh khawtlang inrelbawlna tichak lehzual turin LAD hnuai ah VC House 150 sak thar leh 98 sak that hna thawh a nih thu a sawi. Chhungkaw 1128 hnen ah sangha dil enkawlna tur tanpuina pek a nih thu te, ran enkawlna changtlung a awm theih nana District Veterinary Hospital building thar hawn a ni thu te leh Agriculture department, Horticulture leh KVK kaltlangtea kuthnathawktute thleng phak hmalakna kalpui a nih dan te a tarlang a. Kolasib district chhung a zirna tih hmasawn nan CZS Higher Secondary School building sak that hna kalpui te, DEO quarter sak te, Pangbalkawn RMSA School thawmthat hna kalpui a nih thu a sawi bawk a ni. MLA-LADS hmangin hmun hrang hrangah infiamna hmun tih changtlun a nih thu te, MJA Press Club sak hna thawh te, zirna in hrang hrang thawmthat hna te leh inkalpawhna kawng siam a nih thu Pu K.Lalrinliana chuan a sawi a.

Heng hmasawnna ruhrel hrang hrangte hi a neitu chu mipuite an nih angin tangkai tak a hmang turin leh neitu nihna thinlungpu chung a enkawl zel turin mipuite a chah bawk a ni. School Parade Contingent zingah St. Johns Higher Secondary School in lawmman pakhatna an la a, Unarmed Contingent atangin Mizo Air squadron NCC, Govt. Diakkawn High School ten lawmman pakhatna an la bawk a ni. Sports Stadium a hun hman zawh hian sawm bik te nen DC Bangla ah Independence Day lawmna hi hman chhunzawm a ni bawk.