3926/2022-2023

Kolasib dated 22nd March 2023: Vawiin khan Parish Hall, Venglai, Kolasibah Public Health Engineering, Kolasib WATSAN Division buatsaihin ‘World Water Day 2023’ pual a hun hman niin ‘Accelerating Change to Solve the Water & Sanitation Crisis’ tih thupui a hman a ni a. Pu K.Lalrinliana, Minister, FCS & CA, LAD leh Fisheries department chu khuallian niin Pu John LT Sanga, Deputy Commissioner chu khual zahawm a ni bawk.

Minister Pu K.Lalrinliana chuan United Nations-ina World Water Day 2023 thupui a thlan dan atang hian tui thianghlim renchem leh dahkhawl ngaih pawimawh a tul zia a lan tir thu a sawi a. Tui chu a hmangtu kan pun zel avangin khamkhawp nei tur chuan buaipui nasat a ngaih tawh thu sawiin a hman dan ah inrenchem a ?ul thu leh ruah tui khawl ngaih pawimawh a ?ul thu a sawi. Mipui hriselna chu an tui tlan thianghlim leh thianghlim loh ah thui tak a innghah avangin tui hñar leh a chhevel khua a chengten an bawlhhlawh an sawngbawl dan fimkhur taka kalpui ?hin a ngaih thu Minister chuan a tarlang bawk a ni. Pu K.Lalrinliana chuan khawtlang ah hmasawnna thleng tur chuan hriselna a pawimawh hmasak avangin tui hna humhalh kawng ahte, ruah tui khawl intihhmuh kawngahte hmalak a pawimawh thu sawiin bawlhhlawh siam tlem tur leh paih fimkhur tur a mi dangte zirtirtu nih tum theuh turin kalkhawmte a chah.

Khual zahawm Pu John LT Sanga, Deputy Commissioner chuan tun hma ata tawh lui luanna leh tui hnianghnarna hmun chu ram changkang leh hmasawn hmasa te dinna hmun a nih zel thinna chuan tui chu mihring tan a thil pawimawh tak a nih zia a entir thu a sawi a. Khawvel hmun tam zawk chu tuiin luah khat mahse mihring tan a hmantlak tui thianghlim a tam loh avangin ruah tui khawl leh tui hman ralna kawng a inren thiam inzirtir a pawimawh hle thu a sawi. Deputy Commissioner chuan Kolasib district a khaw 48 chhung a chhungkaw 9038 zingah 8728 chu tui thianghlim dawng thei tur a thlun zawm anga chhinchhiah an nih tawh thu a sawi a. PHED, Kolasib WATSAN Division hmalakna in Kolasib district chu 4 Star Category ah Best Performing District-ah dinhmun 2-na leh Fastest Moving District ah dinhmun 1-na an lo luah tawh thu a tarlang bawk a ni.

‘World Water Day 2023’ pual a hun hmanna hi Er. H.Lalsiamliana, Sr. EE in kaihruaiin Er. Lallawmpuia Sawthly, SDO chuan tui hna humhalh pawimawhna leh ruah tui khawl tangkaina tarlanna hun a hmang a. Pi Rebecca Laldinmawii Hrahsel, DUDO chuan tui thianghlim nei tur a bawlhhlawh paih fimkhur a tul zia leh vawi khat hman plastic hman that lohna Power Point Presentation hmang a entirna hun a nei bawk a ni. Pu Thomas D.Lalengliana, President, Sub-Hqrs, Kolasib district chuan thusawina hun neiin Kolasib district chhung a Sawrkar office hrang hranga thawktute, tlawmngai pawl leh khawtlang hruaitute he hun ah hian telin Pu Lalmuan Puia, Settlement Officer chuan kalkhawmte lawmna thu a sawi bawk a ni. ‘World Water Day 2023’ pual hian tukin khan Pu John LT Sanga, Deputy Commissioner hovin PHED, Kolasib WATSAN Division-a thawktute chuan tui hna humhalh pawimawhna auchhuahpuina kawngzawh an nei bawk a ni.