Food, Civil Supplies & Consumer Affairs, LAD leh Fisheries Department – te changtu Minister Pu K. Lalrinliana chuan nizan khan Lunglei rawn thlengin tukin zing atang khan Lunglei District-a a Department chan hnuaia hmun pawimawh leh office te a tlawh. Lunglei HPC Vice Chairman Pu Lawmawma Tochhawng, Aizawl North III AC bialtu MLA leh Veterinary & Fisheries Board Vice Chairman ni bawk Pu C.Lalmuanpuia, Fisheries Department Secretary Pu Thlamuana leh Lunglei District official-te leh party hruaituten an tawiawm a ni.

Minister leh amah zuitute hian tukin zing khan Zobawk ah LAD Park tlawhin Lunglei DLAO Pu J. Miahlung leh a thawhpuiten an lo dawngsawng a. He Park dinhmun leh hmunhma te enfiahin a chei that dan tur leh mipui tam zawk, a bik takin khualzin mite hipna tura hmalak dan tur te sawihovin ruahmanna a siam pui a ni. Hemi hnu hian Fisheries Department hnuaia sangha chi siam chhuahna hmun Fish Seed Farm Zobawk pawh tlawhin hmalak tul te a hmunah a enfiah a. Fish Seed Farm chu Fish farming ti hmasawn zel tur leh sangha tharchhuah lama kan intodelh theihna tura hmun pawimawh tak a ni tiin he farm ti changtlung zel tura hmalak a ngaih pawimawh thu a sawi.

Minister hian tukin zing vek khan Luangmualah FCS&CA Department Godown leh FCI Godown te a tlawh a. FCS&CA Department Godown, Luangmual ah hian Lunglei DCSO Pi Carolyn LB Khiangte leh a thawhpuiten an lo dawngsawng a. Department hnathawkte chu an inrelbawl dan leh inkaihhruaina bakah hmasawn zel tura an mamawhte a sawipui a. Helai hmuna thawktute hian an harsatna leh mamawhte lo thlenin, a tul anga hmalak sak a tum thu Minister hian a sawi.

Site Visit neih hnu hian Minister leh amah zuitute hian Food, Civil Supplies & Consumer Affairs, LAD leh Fisheries Department Office te tlawh lehin Department office hmunhma te leh mamawhte an enfiah a. A Office tlawh ah te Department hnathawkte meeting tawi neihpuiin Minister chuan anmahni zawn theuha thahnemngai taka thawk tur leh mipui rawngbawltu pawimawh tak an ni tih hre reng turin a chah.